Joǵarǵy Sot tóraǵasy Aslambek Merǵaliev elorda sýdialaryna Astana qalalyq sotynyń jańa tóraǵasy Aidar Smaǵulovty tanystyrdy, dep habarlaidy Dala news.
Joǵarǵy Sottyń málimetinshe, bul qyzmetke taǵaiyndalǵanǵa deiin Aidar Smaǵulov Aqtóbe oblystyq sotynyń tóraǵasy bolǵan. Kezdesýge Astana qalasynyń ákimi Jeńis Qasymbek, elorda sottarynyń sýdialary men qyzmetkerleri, sondai-aq quqyq qorǵaý jáne memlekettik organdardyń ókilderi qatysty.
Aslambek Merǵaliev jańa tóraǵany tanystyra otyryp, onyń kásibi tájiribesin, basqarýshylyq qabiletterin jáne sýdialar qaýymdastyǵyndaǵy bedelin atap ótti.
Joǵarǵy Sot tóraǵasy elorda memleketimizdiń iri saiasi, ákimshilik jáne iskerlik ortalyǵy ekenin aitty. Sondyqtan munda qoǵam úshin mańyzdy ári kúrdeli isterdiń kóp bóligi qaralatynyn atap ótip, sottardyń jumysy joǵary jaýapkershilik pen kásibilikti talap etetinin jetkizdi.
Sonymen qatar Astana sýdialar korpýsynyń aldynda sot tóreligin júzege asyrý sapasyn arttyrý jáne qoǵamnyń sot júiesine degen senimin nyǵaitý mindeti turǵanyn aitty.
Aslambek Merǵaliev Aidar Smaǵulov sottardyń tiimdi jumys isteýine jáne olardyń ári qarai damýyna úles qosatynyna senim bildirdi.
Aita keteiik, Aidar Smaǵulov 1973 jyly Soltústik Qazaqstan oblysynyń Blagoveshenka aýylynda dúniege kelgen.
2001 jyly Qazaq memlekettik zań akademiiasyn támamdaǵan.
2001–2004 jyldary Soltústik Qazaqstan oblysy sottary ákimshiliginiń qurylymdyq bólimshelerinde qyzmet atqarǵan.
2004–2010 jyldary Petropavl qalalyq sotynyń jáne Petropavl qalasynyń №2 sotynyń sýdiasy bolǵan.
2010–2014 jyldary Soltústik Qazaqstan oblysy M.Jumabaev aýdandyq sotynyń tóraǵasy qyzmetin atqarǵan.
2014–2017 jyldary Soltústik Qazaqstan oblystyq sotynyń sýdiasy boldy.
2017–2023 jyldary Soltústik Qazaqstan oblystyq sotynyń azamattyq ister jónindegi sot alqasynyń tóraǵasy qyzmetin atqardy.
2023 jyldan 2026 jylǵy 4 naýryzǵa deiin Aqtóbe oblystyq sotynyń tóraǵasy boldy.
