Búgin, 25 aqpan kúni QR Ulttyq mýzeiinde Mádeniet jáne aqparat ministri Aida Balaevanyń qatysýymen 2024 jylǵy jastarǵa arnalǵan Prezidenttik arnaýly ádebi syilyq jeńimpazdaryn marapattaý rásimi ótti,- dep habarlaidy Dalanews.kz
Jiynda Mádeniet jáne aqparat ministrligi men Qazaqstan Jazýshýylar odaǵynyń strategiialyq áriptestigi aiasynda «Qazaqstannyń ádebi-tanymdyq panoramasy» jobasymen jaryq kórgen 20 jas qalamgerdiń kitaptarynyń tusaýkeseri ótti.
Is-sharaǵa ziialy qaýym ókilderi jáne ministrlik janynan qurylǵan «Alqa» jastar ádebi klýbynyń músheleri qatysty.
«Jas qazaqstandyq jazýshylar men aqyndarǵa arnalǵan Prezidenttik ádebi syilyq 2023 jyly Prezident Jarlyǵymen taǵaiyndalyp, otandyq ádebiet álemindegi mańyzdy oqiǵalardyń birine ainaldy. Bul – Memleket basshysynyń mádeniet salasyn júieli túrde jańǵyrtýǵa baǵyttalǵan bastamalarynyń biri. Bul syilyqtyń basty maqsaty – shyǵarmashyl jastardy qoldaý, jańa týyndylardyń jaryq kórýine jol ashý. Memleket basshysynyń mádeniet pen ónerdi damytýǵa erekshe mán berýi – onyń ustanyp otyrǵan reformalary men bastamalarynyń zańdy jalǵasy. Óitkeni mádenietti, ádebietti damytý – jas urpaqtyń jan-jaqty damýynyń negizgi tetikteriniń biri. Al rýhani turǵydan kemeldengen, bilimdi, eńbeksúigish ári patriot azamattardan quralǵan qoǵamda Zań men Tártip ústemdik qurady, adamdar óz áreketteri úshin jaýapkershilik alady, dástúrge qurmetpen qarap, ulttyń negizgi qundylyqtaryn ardaqtaidy», – dedi Aida Balaeva.
Ministr halqymyzdyń negizgi qundylyqtaryn nasihattaý – ádebiet qairatkerlerine júkteler aýyr ári mártebeli mindet ekenin atap ótti. Sondai-aq, aqyn-jazýshylar qoǵamnyń moraldyq baǵyt-baǵdaryn aiqyndaityn rýhani kóshbasshylar ekenine toqtaldy.
«Sizder óz zamandaryńyzdyń beinesin jańasha jazyp, jańa kózqaras qalyptastyrýǵa tiissizder. Uly qalamgerlerdiń jolyn jalǵastyryp qana qoimai, ádebietti jańa beleske kóterý – sizderdiń qoldaryńyzda. 20 ǵasyrdaǵy ádebiet adamnyń jan álemin tereńnen sýrettese, 21 ǵasyrdyń qalamgerleri jańa tehnologiialar dáýirindegi adam taǵdyry, jahandaný men ulttyq bolmys, jeke tulǵanyń kúresi sekildi taqyryptarǵa qalam terbeýi kerek», – dedi Aida Balaeva.
Basqosýda búgingi ádebi tendentsiialar men ózekti máseleler talqylanyp, túrli usynys-pikirler kóterildi.
Qazaqstandyq jas jazýshylar men aqyndar úshin Prezidenttik arnaýly ádebi syilyǵy «Proza» nominatsiiasy boiynsha «2026» shyǵarmasy úshin Esbol Sotsialhanǵa, «Poeziia» nominatsiiasy boiynsha «Boz ushqat» óleńder jinaǵy úshin Jánibek Baqytuly Álimanovqa, «Dramatýrgiia» nominatsiiasy boiynsha «Apatai» dramalyq týyndysy úshin Álisher Jeńisuly Aitýarǵa, «Balalar ádebieti» nominatsiiasy boiynsha «Roket Era» povesi úshin Áset Júkenuly Syzdyqovqa berildi.
Ádebi syilyqqa 18-35 jas aralyǵyndaǵy qalamgerler buryn halyqaralyq jáne ulttyq baiqaýlarǵa qatyspaǵan týyndylarymen qatysty.
Aita ketsek, jas qalamgerler shyǵarmashylyǵyn qoldaý únemi nazarda. Ótken jyly Prezidenttiń Ulttyq quryltaidaǵy tapsyrmasyna sáikes, 23 sáýir – Ulttyq kitap kúni bolyp bekitildi. Soǵan orai «Ulttyq kitap» baiqaýy jariialandy.
Sondai-aq QR Mádeniet jáne aqparat ministrligi Qazaqstan Jazýshylar odaǵymen «Strategiialyq áriptestik» ornatý boiynsha 3 jańa joba júzge asyrǵan bolatyn.
Atap aitqanda, jas qalamgerler «Qazaqstannyń ádebi-tanymdyq panoramasy» jobasy negizinde elimizdiń ár qiyryn aralap, jańa shyǵarmalar jazdy. Joba nátijesinde jyl sońyna deiin qazaq ádebietine 20 jańa týyndy qosylyp, ár jas qalamgerge 4 mln teńge kóleminde qalamaqy taǵaiyndaldy.
Budan bólek, 2025 jyl – «Jumysshy mamandyqtary jyly». Osy oraida, eńbek mamandyqtarynyń mańyzyn ashý maqsatynda «Erlik pen eńbek dastany» baiqaýy ótkiziledi.
Sonymen qatar «Aiboz» ulttyq ádebi syilyǵy jalǵasyn taýyp keledi. Byltyr Ulttyq syilyqqa 7 nominatsiia boiynsha buryn-sońdy esh jerde jariialanbaǵan 176 týyndynyń qujaty qabyldandy.
