Parıjdegi IýNESKO-nyń shtab-páterinde Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasynyń negizinde qazaqstandyq «Rýhanı jańǵyrý» baǵdarlamasynyń aýqymdy tanystyrylymy bastaldy.
Sharanyń negizgi maqsaty men mindeti týraly "QazAqparat" tilshisine Qazaqstan Respýblıkasy Prezıdenti Ákimshiliginiń İshki saıasat bóliminiń meńgerýshisi Aıda Balaeva aıtyp berdi.
- Aıda Ǵalymqyzy, qazaqstandyq "qoǵamdyq sanany jańǵyrtý baǵdarlamasyn" álemdik sarapshylarǵa osynshalyq joǵarǵy dárejede tanystyrý ne úshin qajet boldy?
- Prezıdentimizdiń «Bolashaqqa baǵdar: rýhanı jańǵyrý» atty maqalasynda usynylǵan ıdeıalar zamanaýı álemdik úrdister hám trendtermen úndes ári sabaqtas. Ol - tek otandastarymyz úshin ǵana emes, dúnıejúzilik qaýymdastyqtar úshin de úlken mańyzǵa ıe joba. Sol sebepti atalǵan baǵdarlamanyń tanystyrylymyn joǵarǵy dárejede ótkizgendi jón sanadyq. Bul rásim qazaqstandyq modeldi ashyq alańǵa, ózgeshe talqyǵa shyǵarý úshin qajet boldy.
- Ne sebepti IýNESKO-ny tańdadyńyz?
- Rýhanı jańǵyrýdyń qazaqstandyq modeliniń mazmuny osy uıymnyń ustanǵan baǵyttaryna jaýap beredi. Baǵdarlama negizinde gýmanıtarly damýǵa súıengen adamı kapıtal sapasyn jaqsartý jatyr. Bul - IýNESKO, qala berdi BUU mindetterimen úndes.
- IýNESKO shtab-páterinde tek qana «Rýhanı jańǵyrý» baǵdarlamasy emes, sonymen qatar «Jahandaǵy zamanaýı qazaqstandyq mádenıet» jobasy tanystyrylyp jatyr. Óz kezeginde bul nemen baılanysty jáne alǵa qandaı mindetter qoıyldy?
- Bizdiń memleket áldeqashan IýNESKO-men konstrýktıvti qatynas ornatqan jáne bul turǵyda úlken tájirıbege ıe. Qazaqstan tarapy aıtýly bastamalar usynyp, atalǵan uıym olarǵa qoldaý bildirip keledi.
Tıisinshe, Qazaqstan 2013-2022 jyldar aralyǵyndaǵy "Mádenıetterdi jaqyndastyrýdyń halyqaralyq onjyldyǵyna" bastamashy boldy. Búgingi kúni memleket basshysynyń tapsyrmasymen Almatyda IýNESKO aıasyndaǵy mádenıetterdi jaqyndastyrýdyń halyqaralyq ortalyǵyn qurý boıynsha belsendi jumys júrip jatyr.
Qazaqstan men IýNESKO-nyń bastamasy negizinde Uly Jibek joly boıymen halyqaralyq onlaın-platformasy resmı túrde óz jumysyn bastady.
Al, «Rýhanı jańǵyrý» baǵdarlamasynyń negizinde júzege asyp jatqan «Jahandaǵy zamanaýı qazaqstandyq mádenıet» jobasy - bul halyqaralyq mádenı baılanys pen ózara dıalogty nyǵaıtatyn taǵy bir mańyzdy bastama.
Budan bólek, otandyq mádenıet pen ádebıettiń ozyq úlgilerin sheteldik aýdıtorıaǵa tanystyrý úshin birqatar sharalar uıymdastyrylmaq. Bizdiń bútin mádenı baılyǵymyzdy saýatty kórsetý úshin halyqaralyq áriptestermen birge jumys atqarǵan durys. Al, bul jumystardyń nátıjeli bastalýy úshin IýNESKO-dan artyq alań tappaıtynymyz anyq.
