Jinalǵan kásipkerler aimaqtyń bas sanitarlyq dárigeriniń shekteý sharalaryn kúsheitý týraly qaýlysyna qatysty pikirlerin aityp, biznes nysandarynyń aldaǵy ýaqyttaǵy jumys barysyn belgiledi.
Búgingi tańda oblysta 12 maýsymǵa sai koronavirýstyń 234 jaǵdaiy, onyń 162-si Semei qalasynda tirkelgen.
Sońǵy on kúnniń ishinde qalada 56 jaǵdai oryn alǵan, oblysta aýrýdyń ósý deńgeii 4,1%- dy qurap otyr.
Semeidegi indettiń taralýy aýqymy baqylaýǵa baǵynbai otyr. Óńirdegi virýs juqtyrǵandardyń 70 paiyzy osy qalaǵa tiesili.
Oblystyń bas sanitarlyq dárigeri Marat Ismailovtyń aitýynsha, barlyǵy 27 úi oshaǵynda 82 adam, onyń ishinde bir oshaqta 12 adam, bes oshaqta 4-ten, alty oshaqta 3-ten, on alty oshaqta 2-den aýyrǵan. Jáne de virýstyń esh belgisiz taralý sany artyp keledi. Semeide virýs belgileri baiqalmaityn 103 adam baqylaýǵa alynǵan.
Qala kásiporyndarynda jappai indet juqtyrý jaǵdailary da bar. Mysaly, Semei qalasynyń teri-venerologiialyq dispanserinde 37 jaǵdai, "Kazpoligraf" JShS qyzmetkerleri arasynda 27 jaǵdai, sondai-aq qarym-qatynas bailanysynda bolǵan 15 jaǵdai tirkelgen.
- Eń qiyn jaǵdai Semei qalasynda. Munda turǵyndardyń virýsty jappai juqtyrý deńgeii kún sanap kóbeiýde. Osyǵan deiin atap ótkenimdei, buǵan sebep, eń birinshi, jaýapty organdardyń óz isine salǵyrt qaraýy, baqylaýdyń joqtyǵy, sondai-aq, turǵyndardyń tártipti saqtamaýy. Qarapaiym erejelerdiń ózin óreskel buzyp otyr, - dedi biznesmenderdiń nazaryn aýdarǵan óńir basshysy Danial Ahmetov.
Sońǵy jaǵdaidy eskere otyryp, biznes qoǵamdastyqtarymen birlesken ortaq sheshim qabyldandy. Búginnen bastap kásipkerlerdiń usynysymen Semeide monitoringtik top quryldy. Olar endi sanitarlyq-epidemiologiialyq talaptardyń oryndalý barysyn ózderi baqylaýǵa alady.
-Qazir bizdiń aldymyzda turǵan basty mindet - azamattarymyzdyń densaýlyǵy men ómirin saqtaý ekenin esten shyǵarmaiyq, - dedi jiyn sońyn qortyndylaǵan Danial Ahmetov.
Jalpy, oblys boiynsha 151 infektsiia oshaǵy baqylaýǵa alynǵan, 1500 -den asa adam oqshaýlanǵan. Onyń 26-sy karantindik statsionarǵa jatqyzylyp, 1486-sy úi karantinine jiberildi.
