«QR Eńbek kodeksiniń 53 babynyń 1-tarmaǵyna sáikes, «Bipek avto – Aziia avto» kompaniialar tobynyń bólimshesi 2021 jyldyń 10 aqpanynda aýmaqtyq jumyspen qamtý organdaryna aǵymdaǵy jyldyń 10 naýryzynan bastap bosatylýy múmkin 1969 jumyskerdiń tizimin usyndy. Olardyń ishinde 1905 adam eńbekke qabiletti bolsa, qalǵan 64 qyzmetker zeinet jasynda. Osyǵan orai, atalǵan azamattardy jumyspen qamtý máselesin sheshý maqsatynda meniń basshylyǵymmen jedel shtab quryldy. Onyń quramyna qadaǵalaý jáne quqyq qorǵaý organdary,
«Bipek avto – Aziia avto» kompaniiasynyń basshylyǵy kirdi. Ótken aptada shtabtyń úsh otyrysy ótti. Birlesken jumystyń alǵashqy nátijesi – eńbekaqyny, kommýnaldyq jáne biýdjetke mindetti tólemderdi tóleý úshin «Bipek avto – Aziia avto» kompaniiasynyń buǵattalǵan shottary ashyldy. Bul rette kompaniia basshylyǵy jalaqyny 2021 jylǵy 10 naýryzǵa deiin tóleý týraly sheshim qabyldaǵanyn atap ótkim keledi, – dedi oblys ákimi.
Búgin ShQO iri kásiporyndarynyń qatysýymen jedel shtabtyń taǵy bir otyrysy ótti. Ózara birlesken jumystyń arqasynda eki kún ishinde aimaqtaǵy jetekshi kompaniialardyń bos jumys oryndarynyń tizimi quryldy.
Jiyn barysynda «Kemont» AQ Personaldarmen jumys departamentiniń basshysy kompaniia bosatylǵan qyzmetkerlerdi jumysqa qabyldaý rásimin bastap ketkenin atap ótti. Búginde 80-nen astam adam aldyn-ala áńgimelesýden ótken jáne olar óz mindetterin aiaqtaǵannan keiin jumysqa kirisýge daiyn ekendigin jetkizgen.
Jumyspen qamtý qyzmeti ár adammen jeke-jeke júrgiziletinin erekshe atap ótkim keledi. Árbir qyzmetker boiynsha jedel aqparatty men kún saiyn saǵat 18.00-de jeke zerdeleitin bolamyn.
– Búgin avtomobilderdi ónerkásiptik qurastyrýmen ainalysatyn otandyq zaýyttardyń basshylyǵymen kelissózder júrgizdim. Olar jinaqta jumys isteitin mamandardy qyzmetke alýǵa daiyn ekendigin jetkizdi. Sondyqtan jedel shtab «Bipek avto – Aziia avto» basshylyǵyna Almaty men Qostanaida jumys istegisi keletin nemese nieti bar 270 adamnyń aldyn ala tizimin daiyndaýdy usyndy, – dedi Danial Ahmetov jeke paraqshasynda.
Oblys ákimi «Balany damytý ortalyǵy» mekemesiniń jumysyn saqtaý baǵytyndaǵy atqarylyp jatqan sharalar týraly da jazdy. Atalmysh mekeme búgingi tańda 260 oryndyq memlekettik tapsyrysty alý úshin tiisti qujattardy jinaýda. Aita keteiik, ortalyqta 73 adam jumys isteidi, onyń 28-i pedagog. Atqarylǵan jumystar aiasynda 11 naýryzdan bastap memlekettik tapsyrys aiasynda qarjylandyrýdy qamtamasyz etiledi. Al qyzmetkerler óz jumystaryn jalǵastyrady.
