Karantindik sharalardyń engizilýine bailanysty biyl eńbek naryǵynda eńbekke qabiletti halyqtyń, ásirese jastardyń artyqshylyǵy baiqaldy. Bul rette halyqty jumyspen jáne turaqty jalaqymen qamtamasyz etý úshin elimizde «Jumyspen qamtýdyń jol kartasy» baǵdarlamasy júzege asyryla bastady.
Ortalyq kommýnikatsiialar qyzmetinde ótken baspasóz konferentsiiasy barysynda ShQO ákimi Danial Ahmetov, óńirde JQJK boiynsha 77,4 mlrd. teńgeniń 819 áleýmettik jáne infraqurylymdyq jobasy ázirlenip, 21 myń jumys orny ashylǵanyn atap ótti.
– 479 áleýmettik nysanǵa jóndeý jumystary júrgizildi. Atap aitqanda, 266 joba bilim berý, 30 densaýlyq saqtaý, 76 mádeniet, 43 sport, 66 joba áleýmettik qamtamasyz etý salasy boiynsha. 87 shaqyrym sý qubyry jelisi, 238 shaqyrym jol men kóshe jóndeldi, 79 aýla abattandyryldy, – dep atap ótti aimaq basshysy.
Semeidegi perinataldyq ortalyqta, Aiagóz, Glýbokoe, Jarma jáne Ulan aýdandaryndaǵy aýdandyq aýrýhanalarda kúrdeli jóndeý jumystary júrgizildi.
Qazirgi ýaqytta Shemonaiha qalasynda deneshynyqtyrý-saýyqtyrý kesheniniń, Semeidegi onkologiialyq dispanserdiń radiologiialyq ortalyǵynyń, sondai-aq eki páterli 37 úidiń qurylysy aiaqtalýda.
Óskemen qalasy men Úrjar aýdanynyń áýejailaryn qaita jańartý, Onkologiia jáne hirýrgiia ortalyǵynyń operatsiialyq blogyn jańǵyrtý, Semei men Óskemende turǵyn úi qurylysy júrgiziletin aýdandarda injenerlik infraqurylym júrgizý jumystary bastaldy.
