Astana qalasy ákimdiginiń baspasóz qyzmeti avtobýs apaty týraly málimdeme jasady, – dep habarlaıdy Dalanews.kz

"Avtobýs júrgizýshisiniń jolaýshylar kóligin júrgizý salasynda jalpy eńbek ótili 15 jyldan asady, al avtoparkte 2020 jyldan beri jumys isteıdi. Oqıǵa bolǵan kúni ol aldyn ala mindetti medısınalyq tekseristen ótip, jumysqa jiberilgen. Jumysqa demalystan keıingi alǵashqy kúni shyqqan. Avtobýs 2024 jylǵy, jelige shyqqan sátte tehnıkalyq turǵydan jaramdy kúıde bolǵan", - delingen habarlamada.

Atalǵan fakt boıynsha qalalyq polısıa departamenti qylmystyq is qozǵady. Oqıǵa jan-jaqty tekserilip, barlyq mán-jaı anyqtalyp jatyr.

Ákimdiktiń málimetinshe, avtobýs júrgizýshileri men kólik kún saıyn jolǵa shyǵar aldynda tolyqtaı tekseristen ótedi.

Sonymen qatar, avtobýstar jelige shyqpas aldynda avtobýs parkiniń jaýapty qyzmetkerleri kún saıyn mynadaı jumys júrgizedi:

• Kóliktiń kózge kórinetin tustaǵy zaqymdaryn tekserý;
• Júrgizýshige qajet jıyntyqtyń (órt sóndirgish, alǵashqy medısınalyq kómek qobdıshasy, súıretkish arqan, domkrat, apattyq toqtaý belgisi) bolýyn tekserý;
• Negizgi toraptar, júıeler men mehanızmderdiń jumys isteýin tekserý;
• Júrgizýshilerdiń medısınalyq tekserisi (qan qysymyn ólsheý, dene qyzýyn ólsheý jáne t.b.).

Qazirgi tańda avtobýstyń baǵanaǵa soǵylýy saldarynan 3 jolaýshy aýrýhanada jatyr. Onyń biri – 2017 jyly týǵan qyz balaǵa ota jasalyp, eki aıaǵy ampýtasıalandy. Taǵy eki jolaýshy qatty zardap shekken.

Qala ákimdigi zardap shekkenderge medısınalyq jáne psıhologıalyq kómek kórsetip jatyr, sondaı-aq materıaldyq jáne basqa da qajetti qosymsha kómek kórsetilmek. Zardap shekken jolaýshylarǵa qoldanystaǵy zańnamaǵa sáıkes, medısınalyq jáne saqtandyrý saraptamalary júrgizilgennen keıin aqshalaı ótemaqy tólenedi.

Eske salaıyq, Astanada jolaýshylar avtobýsy apatqa ushyrady. Avtobýs júrgizýshisi rólge ıe bola almaı, jol jıegindegi baǵanaǵa soǵylǵan.