Avstraliia biligi Telegram messendjerine qarsy sotqa júgindi. Eldiń elektrondy qaýipsizdik jónindegi retteýshisi eSafety platformany terrorizmdi nasihattaityn materialdardy der kezinde joimaǵan dep aiyptap otyr, dep habarlaidy dalanews.kz.
nine.com.au portalynyń habarlaýynsha, is Avstraliianyń Federaldyq sotynda qaralady. Retteýshiniń málimetinshe, Telegram platformasynda terroristik uiym "Islam memleketine" (IG) qatysty beinematerialdar men adamnyń basyn kesip óltirý kórinisteri bar videolar uzaq ýaqyt boiy qoljetimdi bolyp kelgen.
Avstraliia tarapy mundai materialdardyń taralýyna jol bermeý úshin platformalar zań talaptaryn oryndaýǵa mindetti ekenin atap ótti.
Sonymen qatar Reseide Telegram-nyń negizin qalaýshylardyń biri Pavel Dýrovqa qatysty terrorizmge járdemdesti degen aiyptar aiasynda izdeý jariialanǵany belgili boldy. Resei Federaldyq qaýipsizdik qyzmetiniń (FQQ) málimetinshe, birneshe ondaǵan jas Ýkraina Qaýipsizdik qyzmeti paidalanǵan delinetin chat-bot arqyly bailanysqa shyǵyp, keiin órt qoiý, shabýyl jasaý jáne alaiaqtarǵa kómektesý siiaqty áreketterge tartylǵan.
Resei tarapy Telegram ákimshiligine atalǵan chat pen zańsyz materialdardy joiý týraly talap qoiylǵanymen, kompaniia ony oryndamaǵanyn málimdeidi. Al Pavel Dýrov bul aiyptaýlarǵa qatysty resmi túsinikteme bermei, áleýmettik jelide ádepsiz ishara jasaǵany aityldy.
