AQSh-tyń memlekettik hatshysy Entoni Blinken Qyrǵyzstandaǵy "Sheteldik ókilder týraly" zań jobasyna qatysty alańdaýshylyq bildirip, ashyq hat joldaǵan bolatyn. El prezidenti Sadyr Japarov kóp kúttirmei Blinkenniń hatyna jaýap bergen, - dep habarlaidy Dalanews.kz.
Japarovtyń jaýap retinde jazylǵan hatyn onyń baspasóz hatshysy Askat Alagozov jariia etti. Qyrǵyzstan basshysy Blinkenniń hatynda "eldiń ishki isterine aralasý" belgileri baryn aitqan.
Prezident sondai-aq "sheteldik ókilder" zań jobasynyń tujyrymdamasy 1938 jyly qabyldanǵan FARA zańyna uqsaitynyn jetkizgen. Bul AQSh-ta sheteldik agentterdi tirkeý týraly zań bolyp sanalady.
"FARA zańy boiynsha sheteldik agent statýsy tek BAQ ókilderine ǵana emes, ózge de zańdy jáne jeke tulǵalarǵa beriletini belgili. Ol zańdy buzǵan adam ákimshilik nemese qylmystyq jazaǵa ushyraidy. Sondyqtan osy jerde týatyn suraq: sonda sizderge mundai zań qabyldaýǵa bolady, al bizge bolmai ma?", - deidi Japarov.
Hatta Sadyr Japarov el biligi úkimettik emes uiymdardy jáne BAQ-ty qoldaitynyn, onyń ishinde, birneshe jyldan beri sheteldik seriktesterden qarjy alatyndardy da qoldaitynyn jetkizgen. Onyń sózinshe, mundai uiymdarǵa qoiylatyn negizgi talap - zańdardy saqtaý jáne qyzmettiń ashyqtyǵyn qamtamasyz etý.
Odan bólek, Sadyr Japarov Blinken hatynda zań jobasy týraly oiyn jalǵan aqparatqa súienip jazǵanyn atap ótken.
Aita keteiik, AQSh-tyń memlekettik hatshysy Entoni Blinken Qyrǵyzstan prezidentine hat jazǵany týraly 7 aqpanda belgili boldy. Hattyń ózi 17 qańtarda jazylǵan. Blinken hatynda "sheteldik ókilder týraly" zań jobasy qabyldansa úkimettik emes uiymdar úshin aýyr azamattyq jáne qylmystyq jazalar qarastyrylýy múmkin dep alańdaýshylyq bildirgen.
Sondai-aq hatta keibir amerikalyq seriktester de zań jobasyna qatysty alańdai bastaǵany aitylady. Olar Qyrǵyzstandaǵy "qyzmetterin toqtatýdy" qarastyryp otyrǵan kórinedi.
