اقش-تىڭ مەملەكەتتىك حاتشىسى ەنتوني بلينكەن قىرعىزستانداعى "شەتەلدىك وكىلدەر تۋرالى" زاڭ جوباسىنا قاتىستى الاڭداۋشىلىق ءبىلدىرىپ، اشىق حات جولداعان بولاتىن. ەل پرەزيدەنتى سادىر جاپاروۆ كوپ كۇتتىرمەي بلينكەننىڭ حاتىنا جاۋاپ بەرگەن، - دەپ حابارلايدى Dalanews.kz.
جاپاروۆتىڭ جاۋاپ رەتىندە جازىلعان حاتىن ونىڭ باسپا ءسوز حاتشىسى اسكات الاگوزوۆ جاريا ەتتى. قىرعىزستان باسشىسى بلينكەننىڭ حاتىندا "ەلدىڭ ىشكى ىستەرىنە ارالاسۋ" بەلگىلەرى بارىن ايتقان.
پرەزيدەنت سونداي-اق "شەتەلدىك وكىلدەر" زاڭ جوباسىنىڭ تۇجىرىمداماسى 1938 جىلى قابىلدانعان FARA زاڭىنا ۇقسايتىنىن جەتكىزگەن. بۇل اقش-تا شەتەلدىك اگەنتتەردى تىركەۋ تۋرالى زاڭ بولىپ سانالادى.
"FARA زاڭى بويىنشا شەتەلدىك اگەنت ستاتۋسى تەك ب ا ق وكىلدەرىنە عانا ەمەس، وزگە دە زاڭدى جانە جەكە تۇلعالارعا بەرىلەتىنى بەلگىلى. ول زاڭدى بۇزعان ادام اكىمشىلىك نەمەسە قىلمىستىق جازاعا ۇشىرايدى. سوندىقتان وسى جەردە تۋاتىن سۇراق: سوندا سىزدەرگە مۇنداي زاڭ قابىلداۋعا بولادى، ال بىزگە بولماي ما؟"، - دەيدى جاپاروۆ.
حاتتا سادىر جاپاروۆ ەل بيلىگى ۇكىمەتتىك ەمەس ۇيىمداردى جانە باق-تى قولدايتىنىن، ونىڭ ىشىندە، بىرنەشە جىلدان بەرى شەتەلدىك سەرىكتەستەردەن قارجى الاتىنداردى دا قولدايتىنىن جەتكىزگەن. ونىڭ سوزىنشە، مۇنداي ۇيىمدارعا قويىلاتىن نەگىزگى تالاپ - زاڭداردى ساقتاۋ جانە قىزمەتتىڭ اشىقتىعىن قامتاماسىز ەتۋ.
ودان بولەك، سادىر جاپاروۆ بلينكەن حاتىندا زاڭ جوباسى تۋرالى ويىن جالعان اقپاراتقا سۇيەنىپ جازعانىن اتاپ وتكەن.
ايتا كەتەيىك، اقش-تىڭ مەملەكەتتىك حاتشىسى ەنتوني بلينكەن قىرعىزستان پرەزيدەنتىنە حات جازعانى تۋرالى 7 اقپاندا بەلگىلى بولدى. حاتتىڭ ءوزى 17 قاڭتاردا جازىلعان. بلينكەن حاتىندا "شەتەلدىك وكىلدەر تۋرالى" زاڭ جوباسى قابىلدانسا ۇكىمەتتىك ەمەس ۇيىمدار ءۇشىن اۋىر ازاماتتىق جانە قىلمىستىق جازالار قاراستىرىلۋى مۇمكىن دەپ الاڭداۋشىلىق بىلدىرگەن.
سونداي-اق حاتتا كەيبىر امەريكالىق سەرىكتەستەر دە زاڭ جوباسىنا قاتىستى الاڭداي باستاعانى ايتىلادى. ولار قىرعىزستانداعى "قىزمەتتەرىن توقتاتۋدى" قاراستىرىپ وتىرعان كورىنەدى.
