«Aýlalardyń súreńsiz kelbeti kórinis tappaýy kerek» – Kólginov 250 aýla men qoǵamdyq keńistik abattandyrylatynyn aitty
Aýdandar men eldi mekenderdi aralaý kezinde qala turǵyndary aýla aýmaqtary men qoǵamdyq keńistikterdi abattandyrý jóninde jii ótinish bildiredi. Búgin dástúrli túrde apta saiynǵy azamattardy qabyldadym. Kezekte turǵan 11 otbasyn qabyldadym (Byltyr 1,5 myńǵa jýyq qala turǵynyn qabyldadym). Jii qoiylatyn suraqtardyń biri – abattandyrý.
Biyl aýlalarymyzdy aýqymdy túrde ózgertip, turǵyndardyń bos ýaqytyn taza aýada ótkizýi úshin jańa oryndar ashamyz. Jalpy, «Nur-Sultan – jaily qala» master-jospary aiasynda biyl 250-ge jýyq aýla men qoǵamdyq keńistikti abattandyrýdy josparlap otyrmyz. Qalalyq máslihatta qarjylandyrý jospary bekitildi. Degenmen qala turǵyndarynyń ótinishi boiynsha biyl jáne aldaǵy jyldary abattandyrylatyn mekenjailar tizimi engiziledi.
«Halyqtyń biýdjetke qatysýy» jobasy qalanyń barlyq aýdanyna engizildi. Bul joba qala turǵyndaryna óz aýlasynyń syrt-kelbetin ózgertýge múmkindik beredi: fýtbol jáne basketbol alańdary, demalýǵa arnalǵan oryndar bolýy, vorkaýt aýmaqtary jáne t.b. Aýdandyq ákimdiktermen jáne ýrbanistika ortalyǵymen birlesip, biyl qala turǵyndarymen 200-den astam kezdesý ótkizildi, onda turǵyndar aldaǵy ýaqytta salynatyn aýlalar men qoǵamdyq keńistikter tujyrymdamasyn talqylady.
Mysaly, «Agroqalashyq», «Kóktal», «Temirjolshylar», «Internatsionalnyi», «Óndiris», «Kirpichnyi», «Ońtústik-Shyǵys», «Úrker» eldi mekenderinde kórikti oryndar ashylady. Ádettegidei negizgi basymdyqty qalanyń oń jaq bóligine aýdaramyz. Bir kezderi qaraýsyz qalyp, saldarynan qala turǵyndaryna yńǵaisyzdyq týdyrǵan ýchaskelerde jańa jaily oryndar salynady. Sondai-aq, adam kóp júretin ýchaskelerdi yńǵaily etýdi ary qarai da jalǵastyramyz, olardy bir-birimen jalǵastyryp, serýendeýge arnalǵan promenadtar ashamyz.
Úiler men keńselerdiń terezesinen aýlalardyń súreńsiz kelbeti emes, kórikti, jaily, tartymdy oryndar kórinis tabýy kerek. Aýlalar men qoǵamdyq keńistikterdi biz kópfýnktsionaldy, sol siiaqty túrli sporttyq qyzyǵýshylyqtar men jas erekshelikterine qarai daiyndaimyz.
Sońǵy jyldary 500-den astam aýla aýmaǵy men qoǵamdyq keńistik abattandyryldy: kópir asty keńistikter, skeit-aimaqtar, promenad, Teatr býlvary, eldi mekenderdegi saiabaqtar men gúlzarlar, kóshe sportyna arnalǵan kolizei, qutqarýshylardyń, meditsina qyzmetkerleriniń, muǵalimderdiń jáne t.b. qurmetine arnaiy skverler ashyldy.
Memleket basshysy atap ótkendei, balalardyń salaýatty ómir saltyn ustanýy, olardy sportqa baýlý mańyzdy. Abattandyrý kezinde aýdandardy kógaldandyrýǵa da nazar aýdaramyz.
