اۋداندار مەن ەلدى مەكەندەردى ارالاۋ كەزىندە قالا تۇرعىندارى اۋلا اۋماقتارى مەن قوعامدىق كەڭىستىكتەردى اباتتاندىرۋ جونىندە ءجيى ءوتىنىش بىلدىرەدى. بۇگىن ءداستۇرلى تۇردە اپتا سايىنعى ازاماتتاردى قابىلدادىم. كەزەكتە تۇرعان 11 وتباسىن قابىلدادىم (بىلتىر 1،5 مىڭعا جۋىق قالا تۇرعىنىن قابىلدادىم). ءجيى قويىلاتىن سۇراقتاردىڭ ءبىرى – اباتتاندىرۋ.
بيىل اۋلالارىمىزدى اۋقىمدى تۇردە وزگەرتىپ، تۇرعىنداردىڭ بوس ۋاقىتىن تازا اۋادا وتكىزۋى ءۇشىن جاڭا ورىندار اشامىز. جالپى، «نۇر-سۇلتان – جايلى قالا» ماستەر-جوسپارى اياسىندا بيىل 250-گە جۋىق اۋلا مەن قوعامدىق كەڭىستىكتى اباتتاندىرۋدى جوسپارلاپ وتىرمىز. قالالىق ءماسليحاتتا قارجىلاندىرۋ جوسپارى بەكىتىلدى. دەگەنمەن قالا تۇرعىندارىنىڭ ءوتىنىشى بويىنشا بيىل جانە الداعى جىلدارى اباتتاندىرىلاتىن مەكەنجايلار ءتىزىمى ەنگىزىلەدى.
«حالىقتىڭ بيۋدجەتكە قاتىسۋى» جوباسى قالانىڭ بارلىق اۋدانىنا ەنگىزىلدى. بۇل جوبا قالا تۇرعىندارىنا ءوز اۋلاسىنىڭ سىرت-كەلبەتىن وزگەرتۋگە مۇمكىندىك بەرەدى: فۋتبول جانە باسكەتبول الاڭدارى، دەمالۋعا ارنالعان ورىندار بولۋى، ۆوركاۋت اۋماقتارى جانە ت.ب. اۋداندىق اكىمدىكتەرمەن جانە ۋربانيستيكا ورتالىعىمەن بىرلەسىپ، بيىل قالا تۇرعىندارىمەن 200-دەن استام كەزدەسۋ وتكىزىلدى، وندا تۇرعىندار الداعى ۋاقىتتا سالىناتىن اۋلالار مەن قوعامدىق كەڭىستىكتەر تۇجىرىمداماسىن تالقىلادى.
مىسالى، «اگروقالاشىق»، «كوكتال»، «تەمىرجولشىلار»، «ينتەرناسيونالنىي»، «ءوندىرىس»، «كيرپيچنىي»، «وڭتۇستىك-شىعىس»، «ۇركەر» ەلدى مەكەندەرىندە كورىكتى ورىندار اشىلادى. ادەتتەگىدەي نەگىزگى باسىمدىقتى قالانىڭ وڭ جاق بولىگىنە اۋدارامىز. ءبىر كەزدەرى قاراۋسىز قالىپ، سالدارىنان قالا تۇرعىندارىنا ىڭعايسىزدىق تۋدىرعان ۋچاسكەلەردە جاڭا جايلى ورىندار سالىنادى. سونداي-اق، ادام كوپ جۇرەتىن ۋچاسكەلەردى ىڭعايلى ەتۋدى ارى قاراي دا جالعاستىرامىز، ولاردى بىر-بىرىمەن جالعاستىرىپ، سەرۋەندەۋگە ارنالعان پرومەنادتار اشامىز.
ۇيلەر مەن كەڭسەلەردىڭ تەرەزەسىنەن اۋلالاردىڭ سۇرەڭسىز كەلبەتى ەمەس، كورىكتى، جايلى، تارتىمدى ورىندار كورىنىس تابۋى كەرەك. اۋلالار مەن قوعامدىق كەڭىستىكتەردى ءبىز كوپفۋنكسيونالدى، سول سياقتى ءتۇرلى سپورتتىق قىزىعۋشىلىقتار مەن جاس ەرەكشەلىكتەرىنە قاراي دايىندايمىز.
سوڭعى جىلدارى 500-دەن استام اۋلا اۋماعى مەن قوعامدىق كەڭىستىك اباتتاندىرىلدى: كوپىر استى كەڭىستىكتەر، سكەيت-ايماقتار، پرومەناد، تەاتر بۋلۆارى، ەلدى مەكەندەردەگى ساياباقتار مەن گۇلزارلار، كوشە سپورتىنا ارنالعان كوليزەي، قۇتقارۋشىلاردىڭ، مەديسينا قىزمەتكەرلەرىنىڭ، مۇعالىمدەردىڭ جانە ت.ب. قۇرمەتىنە ارنايى سكۆەرلەر اشىلدى.
مەملەكەت باسشىسى اتاپ وتكەندەي، بالالاردىڭ سالاۋاتتى ءومىر سالتىن ۇستانۋى، ولاردى سپورتقا باۋلۋ ماڭىزدى. اباتتاندىرۋ كەزىندە اۋدانداردى كوگالداندىرۋعا دا نازار اۋدارامىز.
