Búginde elimizdiń qai aýylyna aiaq bassań da, keshegi kúnniń tynysy men erteńgi kúnniń úmitin qatar sezesiń. Aýyl – ulttyń jany, urpaqtyń besigi. Sońǵy jyldary sol aýyldyń ortasynda boi kóterip jatqan erekshe bir nysan barú Ol – Memlekettik rámizder alańy. Alǵash kórgende-aq kózińe shalynyp, kóńilińe qýanysh uialatatyn bul alań – Tý men Eltańba, Ánuran jazýly mármár qabyrǵalar – búginde aýyl rýhynyń kórinisine ainalyp otyr.
Buryn aýyl ortasynda músin tursa tańǵalýshy edik. Endi eldik belgi – Tý tigilgen baǵana men rámizder jazylǵan qabyrǵa, ony ainala qorshaǵan gúlzar, kók maisa, jaryq shamdar men tazalyq – qazaqtyń eldik sanasynyń jańa bir deńgeige jetkenin kórsetedi. Bul – jai ǵana músin nemese saiabaq emes. Bul – eldiń eń qasietti uǵymdary – Táýelsizdik, Tý, Otan, Ar-namys uǵymdarynyń tasqa tańbalanǵan kórinisi.
Kei aýyldarda bul alańdar jergilikti ákimdiktiń qoldaýymen salynsa, kópshiliginde bul bastamany qoldaǵan – sol aýyldyń mektep túlekteri. Mektep bitirgenderine 20 nemese 30 jyl bolǵan azamattar týǵan aýyldaryna bir belgi qaldyrǵysy keledi. Buryn mundai kezde kópshilik aýyl meshitin, kópirin, ashanasyn salyp jatsa, qazir osy rámizder alańyna bet burǵan. Bul – qazaqtyń eldik sanasynyń jańarýynyń, ulttyń bolmysyn jańasha tanýynyń kórinisi. Meshit – rýhani tirek bolsa, Memlekettik rámizder alańy – azamattyq sana men Otanǵa adaldyqtyń jarshysy.
Erekshe atap óterligi – mundai bastama ásirese Túrkistan oblysynda keń qanat jaiyp otyr. Ár aýdan, ár aýyl birinen biri qalmai, óz ortalyqtaryna Rámizder alańyn ornatýda. Bul tek báseke emes, bul – eldik sana jarysy. Bul – balanyń kózi úirensin, júregine sińsin, Týǵa qarap boi túzesin degen ata-ananyń amanaty.
Aýyl ortasynda Tý tigilgen biik baǵana, onyń janyndaǵy mármár taqtaǵa jazylǵan Ánurannyń joldary, tóbesinde altyn kún astyndaǵy qyran beinesi bar Eltańba – munyń bári aýyl balasy úshin kishigirim elorda sekildi. Ár oqýshy mektepten qaityp kele jatyp, sol Týǵa kóz salyp ótedi. Ánuran sózin jatqa bilgeni bir bólek, sol ándi júrekpen qabyldaityn urpaq ósip keledi.
Eń áserli kórinis – rámizder alańyn ainaldyra egilgen gúlzarlarǵa oqýshylar ózderi sý quiyp, shelek arqalap tazalyq jasap júrgen sátter. Sol sátte balanyń boiynda Týǵa degen qurmetpen birge eńbekke, tazalyqqa, uqyptylyqqa degen daǵdy qalyptasady. Bul – tárbieniń eń joǵarǵy deńgeii. Sebebi patriotizm – uranmen emes, áreketpen tárbielenedi. Al áreket – kún saiyn mektepke bara jatyp, Týdyń túbindegi gúlge sý quiýdan bastalady.
Búginde aýyldaǵy aǵaiyn da bul nysanǵa erekshe qurmetpen qaraidy. Tazalyqty saqtaidy, ainalasyna kúl tókpeidi, mal jibermeidi. Óitkeni bul – rámizder turǵan jer. Bul – qasietti alań. Tý men Eltańba turǵan jerde ar men uiat, tártip pen tektilik turýy tiis ekenin el ishtei sezip otyr.
Memlekettik rámizder alańynyń taǵy bir mańyzy – ol týǵan jermen bailanys. Aýyldan ketken túlekter, qalada turatyn azamattar dál osy alańdy salý arqyly týǵan topyraqpen rýhani qaita qaýyshyp jatyr. Bul – jai ǵana saǵanysh emes, bul – azamattyq paryz.
Eger erteń osy aýyldan bir oqýshy olimpiada jeńimpazy, bir qyz balýan, bir jas kásipker nemese bir jigit memlekettik qyzmetke kelse, ol ómir boiy rámizder alańynyń túbinde turǵan Týǵa qarap óskenin umytpaidy. Sol Tý onyń kókireginde eldiktiń simvoly retinde emes, óziniń ishki kompasyndai bolyp saqtalady.
Bul bastamanyń taǵy bir utymdy tusy – rámizderdiń mánin túsindirý. Kóp jaǵdaida Tý men Eltańbaǵa qurmet tek formaldy deńgeide júrip jatady. Al aýyl ortasyna ornatylǵan naqty nysan – bul qurmetti vizýaldy, naqty, turaqty formaǵa ainaldyrdy. Endi balaǵa "eltańba nege kók, nege qyran beinelengen, nege shańyraq bar?" dep surasań, ol saýsaǵymen kórsetip turyp túsindirip aita alady. Óitkeni kúnde kórip, kúnde sol jerden ótedi.
Rámizder alańy – aýyl úshin tek sán emes. Bul – simvol ári rýhani joba desek artyq aitqandyq bolmas edi. Mundai jobalardy mektep túlekteri kóterip jatqany – urpaq sabaqtastyǵynyń dáleli. Búgin rámizder alańyn ornatqan túlek, erteń sol aýyldan shyqqan oqýshyǵa jumys taýyp berýi múmkin. Búgin gúl ekken oqýshy erteń sol alańda memlekettik ánurandy jatqa aityp, bolashaqqa qarai batyl qadam basatyn sózsiz.
Túrkistan oblysyndaǵy birneshe aýylda turǵyndar alańdy tek memlekettik merekelerde ǵana emes, ár aptanyń sońynda tazalap, gúlderin túgendep, jaryq shamdaryn jańartyp otyratynyn bilemiz. Bul – halyq pen memlekettiń arasyndaǵy únsiz kelisimniń belgisi.
Alys aýyldyń ortasynan kók Tý jelbirep tursa – sol aýylda úmit bar.
Ánurannyń joldaryn jatqa biletin bala ósip jatsa – sol aýylda bolashaq bar. Eltańbadaǵy shańyraqty túsinetin urpaq bolsa – sol aýylda turaq bar.
Sonda ǵana biz eldigimizdi saqtap, birtutas halyq bolyp qala alamyz.
