Vitse-premer Altai Kólginov Jambyl oblysynyń ákimi Nurjan Nurjigitovpen birge aýyl turǵyndarynyń tabysyn arttyrý jobasy aiasynda qurylǵan birqatar aýyl sharýashylyǵy kooperativterin aralady.
Aita keteiik, Jambyl oblysynda pilottyq jobany júzege asyrý bastalǵaly 20-dan astam aýyl sharýashylyǵy kooperativi qurylyp, 2300-ge jýyq jańa jeke kásipker óz jumysyn bastady. Bul sharalar AÁK alýshylardyń sanyn qysqartyp, jańa turaqty jumys oryndaryn ashýǵa múmkindik berdi.
Qordai aýdanynda kooperativ basshysy T. Sársembaev «ECO Chicken» qus fermasyn keńeitý boiynsha atqarylyp jatqan jumystar men aldaǵy josparlar týraly baiandady. Kásipkerdiń aitýynsha, jaqyn arada jalpy qýaty 520 tonna qus etin quraityn 8 modýldik qus fabrikasyn, 2025 jylǵa deiin taǵy 100 modýldik qus fabrikasyn ornatý josparlanýda. Sondai-aq T. Sársembaev basqa kooperativterge óz isin ashýǵa jáne jumys oryndaryn qurýǵa kómektespek.
«Satymbaev» JK basshysy jobanyń birinshi baǵyty aiasynda 5 sotyq jerge jylyjai salyp, jylyna 12,5 tonna qiiar jinaýda. Sondai-aq konservi tsehyn iske qosqan.
QR Premer-ministriniń orynbasary Baizaq aýdanyndaǵy birqatar aýyl sharýashylyǵy kooperativteriniń de jumysymen tanysty.
Vitse-premer Memleket basshysynyń tapsyrmasy boiynsha ázirlengen baǵdarlamany iske asyrýdyń mańyzdylyǵyna toqtalyp, onyń, eń aldymen, halyqtyń tabysyn arttyrýǵa, sondai-aq ekonomikany ártaraptandyrý, kásipkerlikti damytýmen ushtasqan nátijeli jumyspen qamtýǵa baǵyttalǵanyn atap ótti.
«Bizdiń maqsatymyz – aýyldar men shaǵyn qalalardyń turǵyndarynyń tabysy men turmys deńgeiin arttyrý, jumys oryndaryn qurý, óz ónimderin shyǵarý. Munda aýyl halqynyń tabysyn arttyrý jónindegi joba sapaly iske asyrylýda. Jambyl oblysynda iske qosylǵan joba óziniń tiimdiligin kórsetti. Endi osy tájiribe búkil el kóleminde taratylatyn bolady. Respýblikalyq biýdjetten bul maqsatqa 50 mlrd teńgeden astam qarjy bólindi. Óz kásibin ashqysy keletinder osy baǵdarlamanyń múmkindikterin paidalana alady. Olar óz kásibin asha otyryp, basqa da aýyl turǵyndary úshin jańa jumys oryndaryn quratyn bolady», — dedi Altai Kólginov.
