Aýyldardy joǵary jyldamdyqty ınternetpen qamtamasyz etý aıasynda Sıfrlyq damý, ınovasıalar jáne aeroǵarysh ónerkásibi mınıstri Jaslan Mádıev Almaty oblysyndaǵy Sarybaı bı aýylyna bardy. Bul aýylda «Aýyl telekom» kompanıasy tutynýshylardyń úıine 500 Mbıt/s deıingi jyldamdyqty ınternet ótkizetin Fixed Wireless Access (FWA) tehnologıasyn synaqtan ótkizip jatyr, dep habarlaıdy Dalanews.kz.
Synalyp jatqan tehnologıa ınterneti joq aýyldardy baılanyspen qamtýǵa baǵyttalǵan, sondaı-aq aýyldardaǵy WiFi, ADSL, CDMA EVDO sıaqty eskirgen tehnologıalardy jańǵyrtpaq. Atap aıtqanda, Sarybaı bı aýylynda «Aýyl telekom» kompanıasy ADSL tehnologıasyn FWA-ǵa aýystyrdy.
Osylaısha, aýyldaǵy úılerge 200-300 Mbıt/s jyldamdyqtaǵy ınternetke qosatyn jabdyq ornatylǵan, osyǵan deıin eskirgen ADSL tehnologıasyn paıdalanyp kelgen 129 úı sharýashylyǵynyń 105-i keń jolaqty symsyz qoljetimdi jelige (KJSJ) sátti kóshti. Bul úılerdegi ınternettiń sapasy men jyldamdyǵyn edáýir arttyrdy.
Sarybaı bı turǵyndary ınternet baılanysynyń sapasy olardyń kúndelikti ómirin edáýir jaqsartqanyn atap ótti. Tehnologıa bilim alý, onlaın jumys isteý jáne adamdardyń bir-birimen qashyqtan aralasýy úshin jańa múmkindikter berdi, bul aýyldyq jerlerde ómir súrý deńgeıin jaqsartýdyń mańyzdy qadamy.
«Joba qala men aýyl arasyndaǵy sıfrlyq alshaqtyqty joıý úshin zamanaýı tehnologıalardy qalaı paıdalanýǵa bolatynyn kórsetedi. Jelini jańǵyrtý baǵytynda qolǵa alǵan jumysymyzdyń aqtalǵanyn kórip otyrmyz, ári turǵyndar oń baǵasyn berip jatyr», - dep atap ótti QR Sıfrlyq damý, ınovasıalar jáne aeroǵarysh ónerkásibi mınıstri Jaslan Mádıev.
«Biz enshiles uıymdarymyzdyń biri «Aýyltelekomnyń» jumysyn aýyldardy joǵary jyldamdyqty ınternentpen qamtamasyz etýge baǵyttadyq. Aýyltelekom qazir ońtaıly tehnologıalardy anyqtap, aýyl turǵyndarynyń sapaly ınternetke qol jetkizýi úshin jumys isteýde.
Sarybaı bı aýylyndaǵy testileý FWA – zamanaýı symsyz tehnologıasy aýyldyq jerde joǵary jyldamdyqty ınternet jelisine qosylýdy qamtamasyz ete alatynyn kórsetti», - dep atap ótti «Qazaqtelekom» AQ Basqarma tóraǵasy Baǵdat Mýsın.
«Aýyl telekomnyń» FWA jelisi qazirdiń ózinde 3 aýyldy qamtyp otyr, onda 200-den astam úı sharýashylyǵy jelige qosylǵan, ári jańa abonentterdi qosý prosesi jalǵasýda. Qańtar aıynda jeli taǵy 3 aýylda qoljetimdi bolady, al 2025 jyly «Aýyl telekom» 100-den astam aýyldy jelige qosýdy josparlap otyr, osylaısha taǵy 10 myńnan astam aýyl turǵyny zamanaýı ınternetpen qamtylatyn bolady.
