اۋىلداردى جوعارى جىلدامدىقتى ينتەرنەتپەن قامتاماسىز ەتۋ اياسىندا سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ الماتى وبلىسىنداعى سارىباي بي اۋىلىنا باردى. بۇل اۋىلدا «اۋىل تەلەكوم» كومپانياسى تۇتىنۋشىلاردىڭ ۇيىنە 500 مبيت/س دەيىنگى جىلدامدىقتى ينتەرنەت وتكىزەتىن Fixed Wireless Access (FWA) تەحنولوگياسىن سىناقتان وتكىزىپ جاتىر، دەپ حابارلايدى Dalanews.kz.
سىنالىپ جاتقان تەحنولوگيا ينتەرنەتى جوق اۋىلداردى بايلانىسپەن قامتۋعا باعىتتالعان، سونداي-اق اۋىلدارداعى WiFi، ADSL، CDMA EVDO سياقتى ەسكىرگەن تەحنولوگيالاردى جاڭعىرتپاق. اتاپ ايتقاندا، سارىباي بي اۋىلىندا «اۋىل تەلەكوم» كومپانياسى ADSL تەحنولوگياسىن FWA-عا اۋىستىردى.
وسىلايشا، اۋىلداعى ۇيلەرگە 200-300 مبيت/س جىلدامدىقتاعى ينتەرنەتكە قوساتىن جابدىق ورناتىلعان، وسىعان دەيىن ەسكىرگەن ADSL تەحنولوگياسىن پايدالانىپ كەلگەن 129 ءۇي شارۋاشىلىعىنىڭ 105ء-ى كەڭ جولاقتى سىمسىز قولجەتىمدى جەلىگە (كجسج) ءساتتى كوشتى. بۇل ۇيلەردەگى ينتەرنەتتىڭ ساپاسى مەن جىلدامدىعىن ەداۋىر ارتتىردى.
سارىباي بي تۇرعىندارى ينتەرنەت بايلانىسىنىڭ ساپاسى ولاردىڭ كۇندەلىكتى ءومىرىن ەداۋىر جاقسارتقانىن اتاپ ءوتتى. تەحنولوگيا ءبىلىم الۋ، ونلاين جۇمىس ىستەۋ جانە ادامداردىڭ بىر-بىرىمەن قاشىقتان ارالاسۋى ءۇشىن جاڭا مۇمكىندىكتەر بەردى، بۇل اۋىلدىق جەرلەردە ءومىر ءسۇرۋ دەڭگەيىن جاقسارتۋدىڭ ماڭىزدى قادامى.
«جوبا قالا مەن اۋىل اراسىنداعى سيفرلىق الشاقتىقتى جويۋ ءۇشىن زاماناۋي تەحنولوگيالاردى قالاي پايدالانۋعا بولاتىنىن كورسەتەدى. جەلىنى جاڭعىرتۋ باعىتىندا قولعا العان جۇمىسىمىزدىڭ اقتالعانىن كورىپ وتىرمىز، ءارى تۇرعىندار وڭ باعاسىن بەرىپ جاتىر»، - دەپ اتاپ ءوتتى ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ.
«ءبىز ەنشىلەس ۇيىمدارىمىزدىڭ ءبىرى «اۋىلتەلەكومنىڭ» جۇمىسىن اۋىلداردى جوعارى جىلدامدىقتى ينتەرنەنتپەن قامتاماسىز ەتۋگە باعىتتادىق. اۋىلتەلەكوم ءقازىر وڭتايلى تەحنولوگيالاردى انىقتاپ، اۋىل تۇرعىندارىنىڭ ساپالى ينتەرنەتكە قول جەتكىزۋى ءۇشىن جۇمىس ىستەۋدە.
سارىباي بي اۋىلىنداعى تەستىلەۋ FWA – زاماناۋي سىمسىز تەحنولوگياسى اۋىلدىق جەردە جوعارى جىلدامدىقتى ينتەرنەت جەلىسىنە قوسىلۋدى قامتاماسىز ەتە الاتىنىن كورسەتتى»، - دەپ اتاپ ءوتتى «قازاقتەلەكوم» اق باسقارما ءتوراعاسى باعدات مۋسين.
«اۋىل تەلەكومنىڭ» FWA جەلىسى ءقازىردىڭ وزىندە 3 اۋىلدى قامتىپ وتىر، وندا 200-دەن استام ءۇي شارۋاشىلىعى جەلىگە قوسىلعان، ءارى جاڭا ابونەنتتەردى قوسۋ پروسەسى جالعاسۋدا. قاڭتار ايىندا جەلى تاعى 3 اۋىلدا قولجەتىمدى بولادى، ال 2025 جىلى «اۋىل تەلەكوم» 100-دەن استام اۋىلدى جەلىگە قوسۋدى جوسپارلاپ وتىر، وسىلايشا تاعى 10 مىڭنان استام اۋىل تۇرعىنى زاماناۋي ينتەرنەتپەن قامتىلاتىن بولادى.
