Aqmola oblysynda QR Aýyl sharýashylyǵy ministrligi men óńir ákimdiginiń uiymdastyrýymen respýblikalyq BAQ ókilderiniń qatysýymen press-týr ótti. Jýrnalister zamanaýi agrotehnologiialarmen, egin jinaý naýqanyna daiyndyq barysymen tanysyp, memlekettik qoldaýdyń aýyl turǵyndaryna óndiristi damytýǵa qalai kómektesip jatqanyn bildi,- dep habarlaidy Dalanews.kz
Zerendi aýdanyndaǵy «Viktorovskoe» JShS 23,6 myń gektar jerdi óńdeidi, onyń ishinde 17,8 myń gektary — egistik, 6,8 myń gektary — jaiylym. Egis qurylymynda bidai, arpa, suly, burshaq daqyldary, zyǵyr, raps jáne malazyqtyq shópter bar. Munda zamanaýi tehnika parki, astyq keptirgish, mehanikalandyrylǵan tok jáne tipti óz naýbaihanasy da jumys isteidi. Maýsym kezinde 200-ge deiin adam eńbek etedi.
Kásiporyn memlekettik qoldaý sharalaryn belsendi paidalanady, jeńildetilgen janar-jaǵarmai men tehnika alady, bul turaqty ónim alýǵa múmkindik beredi.
Sharýashylyq direktory Vitalii Goncharovtyń aitýynsha, biyl alǵash ret tálimi jerge qant qyzylshasy egilgen.
«Bul isti endi bastadyq, biraq gektaryna kem degende 30 tonna alýdy josparlap otyrmyz. Bul — jaqsy nátije. Biz aýrýlar men ziiankesterge qarsy tórt ret óńdeý júrgizdik. Salystyrmaly túrde aitsaq, bidaida ádette eki ret jasaimyz. Joba pilottyq, biraq bolashaǵy zor, ásirese qasymyzda qaita óńdeý zaýyty ashylsa», — dedi ol.
Press-týrdyń kelesi nysany — «Jýravlevka-1» JShS. Bul — óńirdegi eń iri sharýashylyqtardyń biri. 122,8 myń gektar jerde dándi, maily, burshaq daqyldary, kartop jáne kókónis ósiriledi. Sondai-aq, munda mal sharýashylyǵy, sonyń ishinde asyl tuqymdy qazaqtyń aqbas siyry baǵyty damyp keledi.
Kásiporyn basshysy Qýantai Sultanovtyń aitýynsha, memlekettik qoldaýdyń arqasynda sharýashylyq mashina-traktor parkiniń 90%-yn jańarta alǵan.
«Bizde 64 jańa kombain bar. «Keń Dala» baǵdarlamasy boiynsha 6 mlrd teńgeden astam qarajat aldyq, tyńaitqysh, janar-jaǵarmai jáne tehnika satyp aldyq. Bul tikelei ónimdiliktiń artýyna áser etti: biyl gektaryna 23 tsentner alýdy josparlap otyrmyz, ótken jyly 18 tsentner boldy. Qazir bizde 530-dan astam adam jumys isteidi. Osy aptada jinaýdy bastaimyz», — dedi ol.
Aqmola oblysy aýyl sharýashylyǵy basqarmasy basshysynyń orynbasary Renat Qasenovtyń aitýynsha, óńirdegi egin jinaý aýmaǵy 5,3 mln gektardy quraidy, bul 2024 jylmen salystyrǵanda 128 myń gektarǵa kóp. Onyń ishinde dándi jáne dándi-burshaqty daqyldar — 4,7 mln ga, maily daqyldar — 495,4 myń ga, kartop — 8,7 myń ga, kókónis — 1,4 myń ga.
«Qolaily aýa raiy men ýaqytyly agrotehnikalyq sharalar egistik alqaptarynyń 80%-ynda jaqsy jaǵdaidy qamtamasyz etti. 4,2 mln gektarda himiialyq aramshópke qarsy óńdeý aiaqtaldy, 273 myń tonna mineraldy tyńaitqysh engizildi. Munyń bári kóktemgi egis jumystaryna jeńildetilgen nesie berý baǵdarlamalarynyń arqasynda múmkin boldy. Biyl 905 fermer 116 mlrd teńgeden astam qoldaý aldy», — dedi ol.
QR AShM strategiia departamenti direktorynyń orynbasary Arailym Álimbekovanyń aitýynsha, biyl agrarshylarǵa jeńildetilgen nesiege shamamen 700 mlrd teńge bólingen, bul on jyl burynǵydan 10 ese kóp. Al jeńildetilgen lizingke — 250 mlrd teńge qarastyrylǵan. Bul sharalar sharýashylyqtarǵa egis jumystaryn ýaqytyly júrgizýge jáne zamanaýi tehnologiialardy engizýge múmkindik beredi.
Aita keteiik, biyl Qazaqstanda aýyl sharýashylyǵy daqyldaryn jinaý aýmaǵy 23,6 mln gektardy quraidy, onyń ishinde 16 mln gektar — dándi jáne dándi-burshaqty daqyldar. Tamyz aiynyń basynda elde 880 myń gektar jinalyp, 1,2 mln tonna astyq bastyryldy. Soltústik óńirlerde jappai jinaý tamyzdyń ortasynda bastalady.
QR AShM eginshilik departamenti basqarmasynyń basshysy Baqyt Iliiasov jýrnalisterge biylǵy jiyn-terim naýqanyna 38 myń kombain, 138 myń traktor jáne 50 myń oraq daiyndalǵanyn aitty.
«Litrine 274 teńge baǵamen 402 myń tonna jeńildetilgen dizel otyny bólindi, bul naryqtyq baǵadan 20% arzan. Ótken jyldan bastap aýqymdy jeńildetilgen tehnika lizingi baǵdarlamasy jumys istep jatyr jáne oǵan qyzyǵýshylyq artyp keledi. 250 mlrd teńgeniń jartysy igerildi. Sonymen qatar, Qazaqstanda John Deere tehnikasyn shyǵarý bastaldy, ony 30% sýbsidiiamen alýǵa múmkindik bar», — dedi ol.
