Aýyl biýdjetiniń kiris kózderi qalai artpaq? Bul suraqqa Ulttyq ekonomika vitse-ministri Baýyrjan Omarbekov Ortalyq kommýnikatsiialar qyzmetinde ótken baspasóz máslihatynda keńinen jaýap berdi, dep habarlaidy Dalanews.kz.
Onyń aitýynsha, qazirgi ýaqytta 4 deńgeili biýdjet kiristeri 8 túrli salyqtyq túsimder, aýdandyq biýdjetten bólinetin qarajat, aiyppuldar, transfertterden qalyptasady. 4 deńgeili biýdjet engizilgennen keiin kirister eki ese artty. Máselen, 2023 jyly jospar boiynsha 308 mlrd teńge túsýge tiis edi, biraq naqty túsim 320 mlrd teńgeni qurady.
"Aýyl biýdjetteriniń qarjylyq derbestigin odan ári arttyrý qajet. Osyǵan bailanysty kelesi túsimder esebinen aýyldyq okrýgter biýdjetiniń kiris kózderin keńeitý usynylyp otyr. Bul - zańdy jáne jeke tulǵalardyń múlik salyǵynyń bir bóligin aýdarý, sý resýrstaryn paidalanǵany úshin tólem, belgili bir qyzmet túrlerimen ainalysý quqyǵy úshin litsenziialyq alym, belgili bir litsenziialar men ruqsattardy paidalanǵany úshin tólemder", - deidi vitse-ministr.
Budan bólek,onyń aitýynsha, jańa Biýdjet kodeksi aiasynda aýyl biýdjetine paidaly qazbalardy óndirý salyǵy beriledi.
"Osylaisha, aýyl biýdjetiniń ózindik kiristeri 4 esege artady — 68 mlrd teńgeden 263 mlrd teńgege deiin", — dedi ol.
Aita ketsek, elimizde aýyldyq aimaqtardy damytý úshin Úkimet tarapynan birqatar shara qolǵa alyndy. 2025 jylǵy derekterge sáikes, respýblikamyzda 7,5 mln halyq ómir súrip jatqan 6179 eldimeken bar. Byltyr aýyldyq jerlerde negizgi kapitalǵa quiylǵan investitsiia kólemi 7,9 trln teńgeni qurady. Aýyl sharýashylyǵy salasynda bir jumysshyǵa shaqqanda eńbek óńimdiligi sońǵy bes jylda 2 esege ósip, 4,2 mln teńgege jetti.
