Halyqtyń tabysyn arttyrý úshin «Aýyl amanaty» jobasy boiynsha osy aýmaqtarǵa basymdyq berildi. Túrkistan oblysynyń ákimi Darhan Satybaldy shalǵai aýdandardaǵy sharýalardyń jaǵdaiyn bilý, aqyldasý, usynystaryn tyńdaý maqsatynda ońtústik aýdandarǵa issaparmen bardy.
Áleýmettik jaǵdaiy tómen otbasylarǵa memlekettik járdemaqylar, áleýmettik kómekter qarastyrylǵan. Biraq ataýly áleýmettik kómek máseleni tolyq sheshpeidi. Adam ózi jumys istep, kásippen shuǵyldanbai, is ónbeitini anyq. Bul rette «Aýyl amanaty» jobasynyń bereri kóp.
Osy joba arqyly nesie alyp, is bastaǵan Medeý Orynqojaev qurylysqa qajetti zattar óndirisin jolǵa qoiǵan. Joba quny – 7,5 mln. teńge. Óńir basshysy turǵyndarǵa osy jobanyń tiimdiligin túsindirip, kásipkerlikpen ainalysýyna qoldaý kórsetý qajet ekenin jetkizdi. Jaýapty basshylarǵa osy baǵytta jumysty kúsheitýdi tapsyrdy. Kásip ashyp, ataýly áleýmettik kómek alýshylar qatarynan shyqqan bul otbasy endi memlekettik járdemaqyǵa táýeldi 14 otbasyn jumyspen qamtyp otyr.
Jetisai aýdanynda oblys ákimi aýyl sharýashylyǵynda jańa tehnologiialardy keńinen qoldaný, «Bir alqaptan jylyna 2-3 ónim alý» jobasyn jandandyrý jáne ózge de máseleler boiynsha sharýalarmen keńesip, pikir almasty.
– Memleket basshysy Qasym-Jomart Toqaev biylǵy Joldaýynda sý kózderin únemdeý máselesin kóterdi. Bul – bizdiń óńir úshin asa mańyzdy. Sondyqtan sýdy únemdeitin ádisterge basymdyq bergen jón. Aýyl sharýashylyǵy taýarlaryn shyǵaryp qana qoimai, ony tereń óńdeýge kóshý kerek. Aýyl turǵyndary, jastary «Aýyl amanaty» jobasy arqyly jeńildetilgen nesie alyp, jumys istese bolady. Oǵan tolyq múmkindik bar, – degen Darhan Satybaldy egistikti ártaraptandyrý, aýyl sharýashylyǵyn ǵylymmen ushtastyrý mańyzdy ekenin atap ótti.
Issapar barysynda óńir basshysy «Tursynbek ata» sharýa qojalyǵynda boldy. «Bir alqaptan jylyna 2-3 ónim alý» jobasyn júzege asyrǵan sharýa qojalyǵynda aldymen 10 gektar jerden 350 tonna qyryqqabat alynǵan. Al ekinshi ónim retinde mash daqylyn ekken.
Aýdan sharýalary maqtanyń ornyna júgeri, mash egýdi qolǵa alýda. Nurálem Ermahanbet beinettiń zeinetin kórý úshin talmai eńbektený kerektigin aitty.
«Kerimhan» sharýa qojalyǵynda oblys ákimi maqta terimine qatysyp, maqtashylarmen kezdesti. Sharýa qojalyǵynyń tóraǵasy Murat Qurbanovtyń aitýynsha, 180 gektarǵa maqta egilse, 40 gektarǵa baqsha daqyly, 47 gektarǵa jońyshqa jáne 33 gektarǵa dándik júgeri egilgen. Maqtanyń jańa suryptary alynyp, ónimdilik arta túsken. Maqtaǵa suranysty arttyrý úshin sapasyn kóterýge kúsh salynǵan.
Sharýalarmen kezdesýde maqta sharýashylyǵyna qatysty túitkilder tarqatylyp, usynystar berildi.
