حالىقتىڭ تابىسىن ارتتىرۋ ءۇشىن «اۋىل اماناتى» جوباسى بويىنشا وسى اۋماقتارعا باسىمدىق بەرىلدى. تۇركىستان وبلىسىنىڭ اكىمى دارحان ساتىبالدى شالعاي اۋداندارداعى شارۋالاردىڭ جاعدايىن ءبىلۋ، اقىلداسۋ، ۇسىنىستارىن تىڭداۋ ماقساتىندا وڭتۇستىك اۋداندارعا ىسساپارمەن باردى.
الەۋمەتتىك جاعدايى تومەن وتباسىلارعا مەملەكەتتىك جاردەماقىلار، الەۋمەتتىك كومەكتەر قاراستىرىلعان. ءبىراق اتاۋلى الەۋمەتتىك كومەك ماسەلەنى تولىق شەشپەيدى. ادام ءوزى جۇمىس ىستەپ، كاسىپپەن شۇعىلدانباي، ءىس ونبەيتىنى انىق. بۇل رەتتە «اۋىل اماناتى» جوباسىنىڭ بەرەرى كوپ.
وسى جوبا ارقىلى نەسيە الىپ، ءىس باستاعان مەدەۋ ورىنقوجايەۆ قۇرىلىسقا قاجەتتى زاتتار ءوندىرىسىن جولعا قويعان. جوبا قۇنى – 7،5 ملن. تەڭگە. ءوڭىر باسشىسى تۇرعىندارعا وسى جوبانىڭ تيىمدىلىگىن ءتۇسىندىرىپ، كاسىپكەرلىكپەن اينالىسۋىنا قولداۋ كورسەتۋ قاجەت ەكەنىن جەتكىزدى. جاۋاپتى باسشىلارعا وسى باعىتتا جۇمىستى كۇشەيتۋدى تاپسىردى. كاسىپ اشىپ، اتاۋلى الەۋمەتتىك كومەك الۋشىلار قاتارىنان شىققان بۇل وتباسى ەندى مەملەكەتتىك جاردەماقىعا تاۋەلدى 14 وتباسىن جۇمىسپەن قامتىپ وتىر.
جەتىساي اۋدانىندا وبلىس اكىمى اۋىل شارۋاشىلىعىندا جاڭا تەحنولوگيالاردى كەڭىنەن قولدانۋ، «ءبىر القاپتان جىلىنا 2-3 ءونىم الۋ» جوباسىن جانداندىرۋ جانە وزگە دە ماسەلەلەر بويىنشا شارۋالارمەن كەڭەسىپ، پىكىر الماستى.
– مەملەكەت باسشىسى قاسىم-جومارت توقايەۆ بيىلعى جولداۋىندا سۋ كوزدەرىن ۇنەمدەۋ ماسەلەسىن كوتەردى. بۇل – ءبىزدىڭ ءوڭىر ءۇشىن اسا ماڭىزدى. سوندىقتان سۋدى ۇنەمدەيتىن ادىستەرگە باسىمدىق بەرگەن ءجون. اۋىل شارۋاشىلىعى تاۋارلارىن شىعارىپ قانا قويماي، ونى تەرەڭ وڭدەۋگە كوشۋ كەرەك. اۋىل تۇرعىندارى، جاستارى «اۋىل اماناتى» جوباسى ارقىلى جەڭىلدەتىلگەن نەسيە الىپ، جۇمىس ىستەسە بولادى. وعان تولىق مۇمكىندىك بار، – دەگەن دارحان ساتىبالدى ەگىستىكتى ءارتاراپتاندىرۋ، اۋىل شارۋاشىلىعىن عىلىممەن ۇشتاستىرۋ ماڭىزدى ەكەنىن اتاپ ءوتتى.
ءىسساپار بارىسىندا ءوڭىر باسشىسى «تۇرسىنبەك اتا» شارۋا قوجالىعىندا بولدى. «ءبىر القاپتان جىلىنا 2-3 ءونىم الۋ» جوباسىن جۇزەگە اسىرعان شارۋا قوجالىعىندا الدىمەن 10 گەكتار جەردەن 350 توننا قىرىققابات الىنعان. ال ەكىنشى ءونىم رەتىندە ماش داقىلىن ەككەن.
اۋدان شارۋالارى ماقتانىڭ ورنىنا جۇگەرى، ماش ەگۋدى قولعا الۋدا. نۇرالەم ەرماحانبەت بەينەتتىڭ زەينەتىن كورۋ ءۇشىن تالماي ەڭبەكتەنۋ كەرەكتىگىن ايتتى.
«كەرىمحان» شارۋا قوجالىعىندا وبلىس اكىمى ماقتا تەرىمىنە قاتىسىپ، ماقتاشىلارمەن كەزدەستى. شارۋا قوجالىعىنىڭ ءتوراعاسى مۇرات قۇربانوۆتىڭ ايتۋىنشا، 180 گەكتارعا ماقتا ەگىلسە، 40 گەكتارعا باقشا داقىلى، 47 گەكتارعا جوڭىشقا جانە 33 گەكتارعا داندىك جۇگەرى ەگىلگەن. ماقتانىڭ جاڭا سۇرىپتارى الىنىپ، ونىمدىلىك ارتا تۇسكەن. ماقتاعا سۇرانىستى ارتتىرۋ ءۇشىن ساپاسىن كوتەرۋگە كۇش سالىنعان.
شارۋالارمەن كەزدەسۋدە ماقتا شارۋاشىلىعىنا قاتىستى تۇيتكىلدەر تارقاتىلىپ، ۇسىنىستار بەرىلدى.
