Jyldyq mólsherlemesi 2,5%-dy quraityn jeńildetilgen nesieni qaidan alýǵa bolady? Kooperativti ne úshin qurý kerek? Memleket tehnikany lizingke alýǵa kómektese me? Elimizdiń barlyq óńirine 40 kúndik aqparattyq marafonǵa attanǵan partiianyń mobildi top músheleri osy jáne ózge de ózekti suraqtarǵa jaýap berýge daiyn.
Basty maqsat – aýyl turǵyndaryna tabysyn, ál-aýqatty men ómir súrý sapasyn arttyrýǵa kómektesý.
Jambyl oblysynda 2019 jyldan bastap iske asyrylyp jatqan «Aýyl halqynyń tabysyn arttyrý» qanatqaqty jobasyn 2023 jyldan bastap respýblika deńgeiinde júzege asyrý josparlanyp otyr.
Baǵdarlama sheńberinde 2023-2025 jyldary ár jyl saiyn elimizdiń barlyq oblysyna jobany iske asyrýǵa arnalǵan biýdjettik nesieler bólý kózdelip otyr. Zańnamaǵa engiziletin túzetýler paketi ázirlendi. Ol qarajat alý tetigin aitarlyqtai jeńildetip, jobany iske asyrýdyń tiimdiligin arttyrady.
– Óńirge bólinetin biýdjettik nesieniń kólemine jáne aýyldardyń nesiege suranysyna bailanysty oblys ákimdikteri kezekti qarjy jylynda jobaǵa qatysatyn aýyldyq okrýgterdi aiqyndaidy. Jumyssyzdar jáne jumyspen qamtylǵan adamdardyń jekelegen sanaty joba aiasynda mikrokredit alýǵa úmitker bola alady. Mysaly – isin jańa bastaǵan kásipkerler, – dep atap ótti «AMANAT» partiiasynyń Hatshysy Eldar Jumaǵaziev.
Partiia músheleri atap ótkendei, Jambyl oblysynyń oń tájiribesi aýyl turǵyndaryn baǵdarlamaǵa qatysýǵa yntalandyrýy tiis. Máselen, osy óńirge respýblikalyq biýdjetten 7,2 mlrd teńge bólindi. Jobaǵa qatysýǵa 11 aýyldyq okrýg irikteldi. Osylaisha, ataýly áleýmettik kómek alýshylardyń sany 3 esege qysqaryp, atalǵan aýyldarda ortasha ailyq tabys mólsheri 1,7 esege ulǵaidy. Jumyssyzdar sany 36%-ǵa azaidy. Mikrokredit boiynsha merzimi ótken, 60 kúnnen asqan tólemder bolmady.
«Aýyl amanaty» alǵashqy mobildi tobynyń jumysy 28 shildede Mańǵystaý oblysynda bastaldy. 1-5 tamyz aralyǵynda mobildi top Aqmola, Shyǵys Qazaqstan, Atyraý oblystaryna attanady. Qalǵan óńirlerde jumys kestege sáikes jalǵasady.
Esterińizge sala keteiik, biyl maýsym-shilde ailarynda «Aýyl amanaty» baǵdarlamasy aiasynda 2 346 aýyldyq okrýg ákimi oqytyldy (mikroderekterdi jinaý, marketingtik taldaý, aýyl ekonomikasyn damytý úshin perspektivalyq baǵyttardy anyqtaý, aýyldyń mamandanýy, áleýetti tabysty biznes-jobalardy iske qosý daǵdylary).
