جىلدىق مولشەرلەمەسى 2،5%-دى قۇرايتىن جەڭىلدەتىلگەن نەسيەنى قايدان الۋعا بولادى؟ كووپەراتيۆتى نە ءۇشىن قۇرۋ كەرەك؟ مەملەكەت تەحنيكانى ليزينگكە الۋعا كومەكتەسە مە؟ ەلىمىزدىڭ بارلىق وڭىرىنە 40 كۇندىك اقپاراتتىق مارافونعا اتتانعان پارتيانىڭ ءموبيلدى توپ مۇشەلەرى وسى جانە وزگە دە وزەكتى سۇراقتارعا جاۋاپ بەرۋگە دايىن.
باستى ماقسات – اۋىل تۇرعىندارىنا تابىسىن، ءال-اۋقاتتى مەن ءومىر ءسۇرۋ ساپاسىن ارتتىرۋعا كومەكتەسۋ.
جامبىل وبلىسىندا 2019 جىلدان باستاپ ىسكە اسىرىلىپ جاتقان «اۋىل حالقىنىڭ تابىسىن ارتتىرۋ» قاناتقاقتى جوباسىن 2023 جىلدان باستاپ رەسپۋبليكا دەڭگەيىندە جۇزەگە اسىرۋ جوسپارلانىپ وتىر.
باعدارلاما شەڭبەرىندە 2023-2025 جىلدارى ءار جىل سايىن ەلىمىزدىڭ بارلىق وبلىسىنا جوبانى ىسكە اسىرۋعا ارنالعان بيۋدجەتتىك نەسيەلەر ءبولۋ كوزدەلىپ وتىر. زاڭناماعا ەنگىزىلەتىن تۇزەتۋلەر پاكەتى ازىرلەندى. ول قاراجات الۋ تەتىگىن ايتارلىقتاي جەڭىلدەتىپ، جوبانى ىسكە اسىرۋدىڭ تيىمدىلىگىن ارتتىرادى.
– وڭىرگە بولىنەتىن بيۋدجەتتىك نەسيەنىڭ كولەمىنە جانە اۋىلداردىڭ نەسيەگە سۇرانىسىنا بايلانىستى وبلىس اكىمدىكتەرى كەزەكتى قارجى جىلىندا جوباعا قاتىساتىن اۋىلدىق وكرۋگتەردى ايقىندايدى. جۇمىسسىزدار جانە جۇمىسپەن قامتىلعان ادامداردىڭ جەكەلەگەن ساناتى جوبا اياسىندا ميكروكرەديت الۋعا ۇمىتكەر بولا الادى. مىسالى – ءىسىن جاڭا باستاعان كاسىپكەرلەر، – دەپ اتاپ ءوتتى «AMANAT» پارتياسىنىڭ حاتشىسى ەلدار جۇماعازييەۆ.
پارتيا مۇشەلەرى اتاپ وتكەندەي، جامبىل وبلىسىنىڭ وڭ تاجىريبەسى اۋىل تۇرعىندارىن باعدارلاماعا قاتىسۋعا ىنتالاندىرۋى ءتيىس. ماسەلەن، وسى وڭىرگە رەسپۋبليكالىق بيۋدجەتتەن 7،2 ملرد تەڭگە ءبولىندى. جوباعا قاتىسۋعا 11 اۋىلدىق وكرۋگ ىرىكتەلدى. وسىلايشا، اتاۋلى الەۋمەتتىك كومەك الۋشىلاردىڭ سانى 3 ەسەگە قىسقارىپ، اتالعان اۋىلداردا ورتاشا ايلىق تابىس مولشەرى 1،7 ەسەگە ۇلعايدى. جۇمىسسىزدار سانى 36%-عا ازايدى. ميكروكرەديت بويىنشا مەرزىمى وتكەن، 60 كۇننەن اسقان تولەمدەر بولمادى.
«اۋىل اماناتى» العاشقى ءموبيلدى توبىنىڭ جۇمىسى 28 شىلدەدە ماڭعىستاۋ وبلىسىندا باستالدى. 1-5 تامىز ارالىعىندا ءموبيلدى توپ اقمولا، شىعىس قازاقستان، اتىراۋ وبلىستارىنا اتتانادى. قالعان وڭىرلەردە جۇمىس كەستەگە سايكەس جالعاسادى.
ەستەرىڭىزگە سالا كەتەيىك، بيىل ماۋسىم-شىلدە ايلارىندا «اۋىل اماناتى» باعدارلاماسى اياسىندا 2 346 اۋىلدىق وكرۋگ اكىمى وقىتىلدى (ميكرودەرەكتەردى جيناۋ، ماركەتينگتىك تالداۋ، اۋىل ەكونوميكاسىن دامىتۋ ءۇشىن پەرسپەكتيۆالىق باعىتتاردى انىقتاۋ، اۋىلدىڭ ماماندانۋى، الەۋەتتى تابىستى بيزنەس-جوبالاردى ىسكە قوسۋ داعدىلارى).
