Qazaq óneriniń qarashańyraǵy Muhtar Áýezov atyndaǵy Qazaq ulttyq drama teatry eń tańdaýly qoiylymdaryn kieli shahardaǵy kórermenniń nazaryna usynbaq. Bul týraly búgin Túrkistanda ótken baspasóz jiynynda keńinen baiandaldy, dep habarlaidy Dalanews.kz
Baspasóz májilisine Muhtar Áýezov atyndaǵy Qazaq ulttyq drama teatrynyń kórkemdik jetekshisi, Qazaqstan Respýblikasynyń Eńbek Eri, KSRO jáne Qazaqstannyń halyq artisi Asanáli Áshimov, teatr direktory, Qazaqstannyń eńbek sińirgen qairatkeri Erkin Jýasbek, teatr artisi, «Qurmet» ordeniniń iegeri Gúlshat Tutova, teatr artisi, Qazaqstannyń eńbek sińirgen qairatkeri Azat Seitmetov qatysty.
Teatr basshysynyń aitýynsha ǵimarat kúrdeli jóndeýge tapsyrylǵannan keiin shyǵarmashylyq ujym respýblika kóleminde jáne alys-jaqyn shetelderge gastroldik saparlarmen baryp, óziniń biregei jumystary – spektaklderimen qalyń jurtshylyqty qýantýdy josparlaǵan. Óner ieleriniń endigi aialdamasy retinde Túrkistan qalasy tańdalǵan. Asanáli aqsaqal ómirin arnaǵan óner jolynan syr shertip, elge kelip qýanǵanyn tilge tiek etti. Tarihi shaharǵa bailanysty estelikterin aityp, jerlesterine Alataýdyń sálemin jetkizdi.
Buqaralyq aqparat quraldaryna erekshe sapar týraly maǵlumattar aityldy. Sodan soń «Ǵasyr jasaǵan ult teatry»taqyrybynda arnaiy jasaqtalǵan jyljymaly, keshendi kórme tanystyryldy. Kórmede Ult teatrynyń 100 jyldyǵyna orai 100 jádiger qoiylǵan.
12-15 mamyr kúnderi Muhtar Áýezov atyndaǵy Qazaq ulttyq drama teatry Túrkistan mýzykalyq drama teatrynyń jáne Raiymbek Seitmetov atyndaǵy Túrkistan qalasynyń sazdy drama teatrynyń sahnalarynda qala turǵyndary men qonaqtaryn kútedi.
- 12 mamyr saǵat 19:00-de Roza Muqanovanyń «Máńgilik bala beine» qasiretnamasyn,
- 13 mamyr saǵat 19:00-de Nemat Kelimbetovtiń «Úmit úzgim kelmeidi» dramasyn,
- 14 mamyr saǵat 18:30-da Tynymbai Nurmaǵambetovtiń «Bes boidaqqa bir toi» mýzykalyq komediiasyn,
- 14 mamyr saǵat 21:00-de kórermen hattary negizinde sahnalanǵan «Sezim hattary» liro-estetikalyq poetikalyq keshin,
- 15 mamyr saǵat 19:00-de Sherhan Murtazanyń «Ai men Aisha» dramasyn kórermen nazaryna usynady.
Aita keteiik, Memleket basshysy Qasym-Jomart Toqaev ótken jyly «Mádeniet jáne óner qyzmetkerleri kúnine» orai ótken saltanatty jiynda Muhtar Áýezov atyndaǵy Qazaq ulttyq drama teatry ǵimaratynyń tolyǵymen qaita jóndeýden ótetini týraly málimdegen bolatyn. Bul jumys atalǵan óner ordasynyń 100 jyldyq mereitoi saltanatyna orai kelesi jyly aiaqtalady.
