قازاق ونەرىنىڭ قاراشاڭىراعى مۇحتار اۋەزوۆ اتىنداعى قازاق ۇلتتىق دراما تەاترى ەڭ تاڭداۋلى قويىلىمدارىن كيەلى شاھارداعى كورەرمەننىڭ نازارىنا ۇسىنباق. بۇل تۋرالى بۇگىن تۇركىستاندا وتكەن باسپا ءسوز جيىنىندا كەڭىنەن باياندالدى، دەپ حابارلايدى Dalanews.kz
باسپا ءسوز ماجىلىسىنە مۇحتار اۋەزوۆ اتىنداعى قازاق ۇلتتىق دراما تەاترىنىڭ كوركەمدىك جەتەكشىسى، قازاقستان رەسپۋبليكاسىنىڭ ەڭبەك ەرى، كسرو جانە قازاقستاننىڭ حالىق ءارتيسى ءاسانالى ءاشىموۆ، تەاتر ديرەكتورى، قازاقستاننىڭ ەڭبەك سىڭىرگەن قايراتكەرى ەركىن جۋاسبەك، تەاتر ءارتيسى، «قۇرمەت» وردەنىنىڭ يەگەرى گۇلشات تۇتوۆا، تەاتر ءارتيسى، قازاقستاننىڭ ەڭبەك سىڭىرگەن قايراتكەرى ازات سەيتمەتوۆ قاتىستى.
تەاتر باسشىسىنىڭ ايتۋىنشا عيمارات كۇردەلى جوندەۋگە تاپسىرىلعاننان كەيىن شىعارماشىلىق ۇجىم رەسپۋبليكا كولەمىندە جانە الىس-جاقىن شەتەلدەرگە گاسترولدىك ساپارلارمەن بارىپ، ءوزىنىڭ بىرەگەي جۇمىستارى – سپەكتاكلدەرىمەن قالىڭ جۇرتشىلىقتى قۋانتۋدى جوسپارلاعان. ونەر يەلەرىنىڭ ەندىگى ايالداماسى رەتىندە تۇركىستان قالاسى تاڭدالعان. ءاسانالى اقساقال ءومىرىن ارناعان ونەر جولىنان سىر شەرتىپ، ەلگە كەلىپ قۋانعانىن تىلگە تيەك ەتتى. تاريحي شاھارعا بايلانىستى ەستەلىكتەرىن ايتىپ، جەرلەستەرىنە الاتاۋدىڭ سالەمىن جەتكىزدى.
بۇقارالىق اقپارات قۇرالدارىنا ەرەكشە ساپار تۋرالى ماعلۇماتتار ايتىلدى. سودان سوڭ «عاسىر جاساعان ۇلت تەاترى»تاقىرىبىندا ارنايى جاساقتالعان جىلجىمالى، كەشەندى كورمە تانىستىرىلدى. كورمەدە ۇلت تەاترىنىڭ 100 جىلدىعىنا وراي 100 جادىگەر قويىلعان.
12-15 مامىر كۇندەرى مۇحتار اۋەزوۆ اتىنداعى قازاق ۇلتتىق دراما تەاترى تۇركىستان مۋزىكالىق دراما تەاترىنىڭ جانە رايىمبەك سەيتمەتوۆ اتىنداعى تۇركىستان قالاسىنىڭ سازدى دراما تەاترىنىڭ ساحنالارىندا قالا تۇرعىندارى مەن قوناقتارىن كۇتەدى.
- 12 مامىر ساعات 19:00-دە روزا مۇقانوۆانىڭ «ماڭگىلىك بالا بەينە» قاسىرەتناماسىن،
- 13 مامىر ساعات 19:00-دە نەمات كەلىمبەتوۆتىڭ «ءۇمىت ۇزگىم كەلمەيدى» دراماسىن،
- 14 مامىر ساعات 18:30-دا تىنىمباي نۇرماعامبەتوۆتىڭ «بەس بويداققا ءبىر توي» مۋزىكالىق كومەدياسىن،
- 14 مامىر ساعات 21:00-دە كورەرمەن حاتتارى نەگىزىندە ساحنالانعان «سەزىم حاتتارى» ليرو-ەستەتيكالىق پوەتيكالىق كەشىن،
- 15 مامىر ساعات 19:00-دە شەرحان مۇرتازانىڭ «اي مەن ايشا» دراماسىن كورەرمەن نازارىنا ۇسىنادى.
ايتا كەتەيىك، مەملەكەت باسشىسى قاسىم-جومارت توقايەۆ وتكەن جىلى «مادەنيەت جانە ونەر قىزمەتكەرلەرى كۇنىنە» وراي وتكەن سالتاناتتى جيىندا مۇحتار اۋەزوۆ اتىنداعى قازاق ۇلتتىق دراما تەاترى عيماراتىنىڭ تولىعىمەن قايتا جوندەۋدەن وتەتىنى تۋرالى مالىمدەگەن بولاتىن. بۇل جۇمىس اتالعان ونەر ورداسىنىڭ 100 جىلدىق مەرەيتوي سالتاناتىنا وراي كەلەسى جىلى اياقتالادى.
