Kreml mańyzdy aktivteriniń basym bóligin Batyspen "bólisip" jatqan Qazaqstannyń saiasi sheshimine alańdaýshylyq tanytyp otyr, dep habarlaidy Dalanews.kz.
Osy tusta reseilik media eldegi birneshe máseleni alǵa tartady.
Sonyń biri - Qazaqstannyń 20-dan astam áýejaiyn Eýropadan kelgen investorlardyń basqarýyna berýge bailanysty sheshimi. Iá, kólik ministri Marat Qarabaev birneshe kún buryn osyndai málimdeme jasaǵan edi.
Qazir Astana men Almaty áýejailary sheteldik kompaniialardyń baqylaýynda. Sonymen qatar Qarabaev Kaspii teńiziniń jaǵasyndaǵy Quryq jáne Aqtaý porttary da keiin jekeshelendirý múmkindigimen eýropalyq kompaniialardyń basqarýyna beriletinin aitqan.
Reseilik propaganda budan bólek “qara altyndy” óndirýde AQSh-tyń kósh bastap turǵanyna alańdaýly. 2023 jyly amerikalyq kompaniialar Qazaqstandaǵy munaidyń 30,9%-yn, eýropalyq kompaniialar 18,4%-yn, Qytai 11,4% óndirdi. Reseidiń úlesi tórt paiyzǵa da jetpeidi.
Qazaqstan aýmaǵynda anglosaksondyq quqyqtyq júie negizinde jumys isteitin “Astana” halyqaralyq qarjy ortalyǵy da Máskeý ideologtarynyń qytyǵyna tiiýde.
"Astana AQSh-tyń áskeri biologiialyq zerthanalaryna esik ashyp berdi. Elde orysfobiia asqynyp tur. 2025 jylǵa qarai qazaq tili kirillitsadan latynǵa aýysyp, "uly" orys tilin tunshyqtyryp tynbaq.
Árbirden soń munyń bárine Nazarbaev kináli. Memlekettiń baǵyt-baǵdaryn Batysqa qarai burǵan osy eldiń eks-prezidenti. 2017 jyly latyn álipbiine kóshý týraly jarlyqqa da qol qoiǵan Nazarbaev ekenin umytpaiyq", - deidi reseilik telegram arnalar.
Kremldi Batystyń demeýshiligimen jáne Qazaqstannyń qatysýymen ótetin aitýly is-sharalar sanynyń artýy da alańdatyp otyr.
29-30 qańtarda Briýsselde Eýropalyq Odaq pen Ortalyq Aziia elderi arasynda kólik bailanysyn damytý maqsatynda Global Gateway investorlar forýmy ótken. Munda Qazaqstan, Qyrǵyzstan, Tájikstan, Túrkimenstan, Ózbekstan memleketteri tóbe kórsetkenin bilemiz.
Batys biznesmenderi aldaǵy 5 jylda Qazaqstannyń kólik salasyna 40 milliard eýro kóleminde investitsiia tartýdy kózdep otyr. Osyǵan bailanysty EO kompaniialary aviatsiia, temirjol jáne teńiz tasymaly salasyndaǵy jańa jobalarǵa belsendi qatysýǵa shaqyrylýda.
Qala berdi, reseilik propaganda 2023 jyly 19 qyrkúiekte Niý-Iorkte Ortalyq Aziia-AQSh sammiti (C5+1) ótkenin de eske salǵan. Onda AQSh Prezidenti Qazaqstan, Qyrǵyzstan, Tájikstan, Túrkimenstan jáne Ózbekstan prezidentterimen kezdesken bolatyn.
Atap aitqanda, “Ortalyq Aziianyń orasan zor mineraldyq bailyǵyn igerý jáne mańyzdy paidaly qazbalardyń qaýipsizdigin jaqsartý úshin C5+1 mańyzdy paidaly qazbalar boiynsha dialog” ótkizgenin alǵa tartady.
Kremlden tikelei qarjy alatyn telegram arnalardyń pikirinshe, Amerika Qazaqstannyń eń aldymen ýranyna qyzyǵýshylyq tanytýda.
"Batystyń Qazaqstandy ózine baǵyndyrýǵa degen qulshynysy kúsheiip tur.
Qazaqstannyń ekonomikalyq aktivteriniń birte-birte Batystyń qolyna ótýi Astana saiasi jáne ideologiialyq salasyna áser etpei qoimaidy. Bul el túptiń túbinde “Ýkraina-2” bolýy múmkin.
Qazirden bastap áreket kóshý qajet. Batystyń jolyn kesip, Astana úshin "qyzyl syzyqty" aiqyndamasaq, 10-15 jyldan keiin Qazaqstanda “ýkrain keisi” paida bolady", - deidi olar.
