Ákim arnaiy kelgen Rasylbai sharýa qojalyǵy Raiymbek aýdanyndaǵy jetekshi sharýa qojalyqtarynyń biri. Búginde sharýashylyqtyń qorasynda asyltuqymdy iri qaralar ósirilýde.
Biyl sharýashylyq basshysy taǵy da 470 bas gereford tuqymdy malyn alyp, asyltuqymdy mal basyn myńǵa jetkizýdi kózdep otyr. Aýdan ákimi Jolan Omarovqa sharýashylyqtyń jumysy jaiynda Ǵalym Rasylbai myrza oiǵa alǵan isteriniń bári ret-retimen iske asyp jatqanyn áńgimelep berdi.
– Jalpy, memlekettiń «Sybaǵa» baǵdarlamasy boiynsha alǵan 73 mln teńgeniń 12 mln teńgesin tehnika alýǵa jumsadyq. Atap aitsaq, IRT-165 shóp týraityn qurylǵy men nóldik tehnologiia jáne MTZ-892 traktoryn aldyq. Qazirgi tańda 250 gektar jerge «Raýndap EKSTRA» gerbitsidin seýip, aram shópteri ólgennen keiin 100 gektaryna – espartset, 100 gektaryna – bidaishóp jáne 50 gektaryna arpa sebýdi josparlap otyrmyz. Osylaisha, iri qaranyń qystai jep shyǵatyn jemshóbin ózimiz daiyndaýǵa kiristik, – dedi qojalyq tóraǵasy. Óz kezeginde sharýa Resei memleketi Altai aimaǵynan ákelingen gereford tuqymdy analyq bas iri qaraǵa qoldan uryqtandyryp, aýdandaǵy asyltuqymdy mal sanyn kóbeitýge de bel býyp, bilek sybana kiriskenderin aitty.
