جەرىنىڭ تۇگىن تارتساڭ مايى شىعاتىن رايىمبەك اۋدانىندا بۇل كۇندە اۋىل شارۋاشىلىعى سالاسى قارقىندى دامۋدا. اۋىل ەڭبەككەرلەرى ءىسىنىڭ ىلگەرى باسۋىنا مەملەكەتتىك دەڭگەيدە قابىلداعان باعدارلامالار سەپتىگىن تيگىزىپ كەلەدى. جاقىندا رايىمبەك اۋدانىنىڭ اكىمى جولان وماروۆ سارىجاز اۋىلىنا اتباسىن بۇرىپ، راسىلباي شارۋا قوجالىعىنىڭ جۇمىسىمەن تانىسىپ قايتتى.

اكىم ارنايى كەلگەن راسىلباي شارۋا قوجالىعى رايىمبەك اۋدانىنداعى جەتەكشى شارۋا قوجالىقتارىنىڭ ءبىرى. بۇگىندە شارۋاشىلىقتىڭ قوراسىندا اسىلتۇقىمدى ءىرى قارالار وسىرىلۋدە.

2016 جىلدىڭ ناۋرىز ايىنان باستاپ ءوز جۇمىسىن باستاعان قوجالىق «سىباعا» باعدارلاماسى اياسىندا رەسەيدىڭ التاي ايماعىنان گەرەفورد تۇقىمدى ءىرى قارانىڭ 235 انالىق باسىن الىپ كەلگەن بولاتىن. بۇگىندە اسىلتۇقىمدى ءىرى قارانىڭ ءبارى نارىنقول جەرىنە تولىقتاي جەرسىنىپ، ونىمدەرىن بەرىپ جاتىر. و باستا اسىلتۇقىمدى ءىرى قارالاردى اكەلۋ ءۇشىن شارۋاشىلىق 73 ملن تەڭگە شىعىنداعان بولاتىن.

بيىل شارۋاشىلىق باسشىسى تاعى دا 470 باس گەرەفورد تۇقىمدى مالىن الىپ، اسىلتۇقىمدى مال باسىن مىڭعا جەتكىزۋدى كوزدەپ وتىر. اۋدان اكىمى جولان وماروۆقا شارۋاشىلىقتىڭ جۇمىسى جايىندا عالىم راسىلباي مىرزا ويعا العان ىستەرىنىڭ ءبارى رەت-رەتىمەن ىسكە اسىپ جاتقانىن اڭگىمەلەپ بەردى.

– جالپى، مەملەكەتتىڭ «سىباعا» باعدارلاماسى بويىنشا العان 73 ملن تەڭگەنىڭ 12 ملن تەڭگەسىن تەحنيكا الۋعا جۇمسادىق. اتاپ ايتساق، يرت-165 ءشوپ تۋرايتىن قۇرىلعى مەن نولدىك تەحنولوگيا جانە متز-892 تراكتورىن الدىق. قازىرگى تاڭدا 250 گەكتار جەرگە «راۋنداپ ەكسترا» گەربيسيدىن سەۋىپ، ارام شوپتەرى ولگەننەن كەيىن 100 گەكتارىنا – ەسپارسەت، 100 گەكتارىنا – ءبيدايشوپ جانە 50 گەكتارىنا ارپا سەبۋدى جوسپارلاپ وتىرمىز. وسىلايشا، ءىرى قارانىڭ قىستاي جەپ شىعاتىن جەمشوبىن ءوزىمىز دايىنداۋعا كىرىستىك، – دەدى قوجالىق ءتوراعاسى. ءوز كەزەگىندە شارۋا رەسەي مەملەكەتى التاي ايماعىنان اكەلىنگەن گەرەفورد تۇقىمدى انالىق باس ءىرى قاراعا قولدان ۇرىقتاندىرىپ، اۋدانداعى اسىلتۇقىمدى مال سانىن كوبەيتۋگە دە بەل بۋىپ، بىلەك سىبانا كىرىسكەندەرىن ايتتى.