Jetisý oblysy Balasaz aýylynda 32 jastaǵy Aizat Jumanova jantúrshigerlik jaǵdaida qaza tapty. Áielin qatygezdikpen óltirdi degen kúdikpen onyń kúieýi ustaldy. Marqumnyń týystary Aizattyń denesinde saý jer qalmaǵanyn, onyń qatty azaptalǵanyn aityp, shyndyqtyń ashylýyn talap etti, dep habarlaidy Dalanews.kz 31-arnaǵa silteme jasap.
Aizattyń ápkesi Raýshan Dáýrenbekovanyń sózinshe, marqumnyń denesindegi jaraqattary týraly aitty.
“Betin ashqanda beti qap-qara bolyp ketken eken. Mamasy kórdi de, jylap burylyp ketti. Basynyń astyna qolymdy tyǵyp qaraǵanda bas-súieginiń synǵanyn baiqadym. Ustaǵanda basy jup-jumsaq, shúide tusy, shashy túgel sý, basy qoqym eken. Sol jaq jaǵynyń synǵanyn baiqadym. Ernin ashyp edim, aýzy qan eken. Qulaǵyn qaraǵanda qulaǵy da jyrylǵan”, – deidi týysy Raýshan Dáýrenbekova.
Qaiǵyly oqiǵa maýsym aiynda oryn alǵan. Kúdikti er adam áieli terezeden qulap, jaraqat aldy degen ýáj aitqan. Alaida marqumnyń týystary bul nusqaǵa senbei otyr. Olardyń aitýynsha, Aizat ómirinde bir ret te zorlyq týraly shaǵymdanbaǵan. Anasy Sáýle Jumanova qyzynyń jýastyǵyn kúieýbalasy paidalandy dep esepteidi.
“Meniń qyzym osy kúnge deiin bir aýyz sóz aityp kórmepti. Onyń soqqanyn endi ǵana elden estip jatyrmyz ǵoi. Maǵan aitpaǵan ǵoi. Aitsa, basqasha jaǵdai bolatyn edi. Jýastyǵyn basyndy qyzymnyń. Jaraidy, ol ózi qulasa eshteńe demes edim. Men anandai dúnieden, qalai bolsa da shyndyqty talap etemin. Shyndyqqa kóz jetkizgim keledi”, – deidi Sáýle Jumanova.
Aizat pen onyń kúieýi úsh jyl buryn shańyraq kótergen. Aizattyń artynda 2 jasar qyzy qaldy.
Qazir bul iske qatysty Jetisý oblysy politsiiasy Qylmystyq kodekstiń “Densaýlyqqa qasaqana aýyr ziian keltirý” baby boiynsha tergeý júrgizip jatyr.
“Qylmystyq isti jan-jaqty jáne obektivti tergeý maqsatynda barlyq qajetti saraptamalar taǵaiyndaldy. Taraptardyń ýájderi muqiiat tekseriledi. Kináli adam zań boiynsha jaýapqa tartylady”, – dep málimdedi oblystyq politsiia departamentiniń baspasóz qyzmetinen Beksultan Ánetuly.
Aita keteiik, buǵan deiin Jetisý oblysynda 32 jastaǵy áieldiń qaza tapqany týraly jazǵan edik. Marqumnyń týystary kúdikti onyń kúieýi ekenin aitady.
Qaiǵyly oqiǵa týraly alǵashqy aqparat jýrnalist Sandýǵash Dúisenovanyń paraqshasynda jariialandy. Oqiǵa Aqsý aýdanyna qarasty Balasaz aýylynda oryn alǵan.
"Kúieýi ony asa qatygezdikpen óltirgen. Qandy oqiǵa Aizattyń eki jasar qyzynyń kóz aldynda bolǵan. Aldymen olardyń arasynda janjal shyqqan. Keiin birneshe saǵat boiy aiaýsyz azaptaý jalǵasqan. Aizattyń denesinde azaptaýdyń belgisi bolǵan – jabyq bassúiek-mi jaraqaty, miynyń isinýi, bassúiektiń negiziniń synýy, qol-aiaq pen jambastyń kóptegen synyǵy, denesinde dóreki betkeimen súirelgen izder. Týystary ony arqanmen atqa bailap, dalada súiregen dep boljaidy", – dep jazdy jýrnalist.
Týystarynyń sózinshe, marqumnyń denesinde saý jer qalmaǵan.
"Politsiianyń málimetinshe, Aizat Jumanova 22 maýsym kúni túngi saǵat 02:30-da Taldyqorǵan qalalyq aýrýhanasyna jetkizilgen. Jarty saǵattan soń dárigerler onyń qaitys bolǵanyn rastaǵan. Alaida týystary buǵan senbeidi. Olar Aizat sol sátke deiin-aq jan tapsyrǵan dep esepteidi", – dep jazdy Dúisenova.
Politsiia bul fakti boiynsha QR QK 106-babynyń 3-bóligimen "Abaisyzda ólimge ákep soqqan aýyr dene jaraqatyn keltirý" baby boiynsha qylmystyq is qozǵaǵan. Alaida týystary bul isti "Asa qatygezdikpen jasalǵan adam óltirý" babyna aýystyrýdy talap etti.
