جەتىسۋ وبلىسى بالاساز اۋىلىندا 32 جاستاعى ايزات جۇمانوۆا جانتۇرشىگەرلىك جاعدايدا قازا تاپتى. ايەلىن قاتىگەزدىكپەن ءولتىردى دەگەن كۇدىكپەن ونىڭ كۇيەۋى ۇستالدى. مارقۇمنىڭ تۋىستارى ايزاتتىڭ دەنەسىندە ساۋ جەر قالماعانىن، ونىڭ قاتتى ازاپتالعانىن ايتىپ، شىندىقتىڭ اشىلۋىن تالاپ ەتتى، دەپ حابارلايدى Dalanews.kz 31-ارناعا سىلتەمە جاساپ.
ايزاتتىڭ اپكەسى راۋشان داۋرەنبەكوۆانىڭ سوزىنشە، مارقۇمنىڭ دەنەسىندەگى جاراقاتتارى تۋرالى ايتتى.
“بەتىن اشقاندا بەتى قاپ-قارا بولىپ كەتكەن ەكەن. ماماسى كوردى دە، جىلاپ بۇرىلىپ كەتتى. باسىنىڭ استىنا قولىمدى تىعىپ قاراعاندا باس-سۇيەگىنىڭ سىنعانىن بايقادىم. ۇستاعاندا باسى جۇپ-جۇمساق، شۇيدە تۇسى، شاشى تۇگەل سۋ، باسى قوقىم ەكەن. سول جاق جاعىنىڭ سىنعانىن بايقادىم. ەرنىن اشىپ ەدىم، اۋزى قان ەكەن. قۇلاعىن قاراعاندا قۇلاعى دا جىرىلعان”، – دەيدى تۋىسى راۋشان داۋرەنبەكوۆا.
قايعىلى وقيعا ماۋسىم ايىندا ورىن العان. كۇدىكتى ەر ادام ايەلى تەرەزەدەن قۇلاپ، جاراقات الدى دەگەن ءۋاج ايتقان. الايدا مارقۇمنىڭ تۋىستارى بۇل نۇسقاعا سەنبەي وتىر. ولاردىڭ ايتۋىنشا، ايزات ومىرىندە ءبىر رەت تە زورلىق تۋرالى شاعىمدانباعان. اناسى ساۋلە جۇمانوۆا قىزىنىڭ جۋاستىعىن كۇيەۋبالاسى پايدالاندى دەپ ەسەپتەيدى.
“مەنىڭ قىزىم وسى كۇنگە دەيىن ءبىر اۋىز ءسوز ايتىپ كورمەپتى. ونىڭ سوققانىن ەندى عانا ەلدەن ەستىپ جاتىرمىز عوي. ماعان ايتپاعان عوي. ايتسا، باسقاشا جاعداي بولاتىن ەدى. جۋاستىعىن باسىندى قىزىمنىڭ. جارايدى، ول ءوزى قۇلاسا ەشتەڭە دەمەس ەدىم. مەن انانداي دۇنيەدەن، قالاي بولسا دا شىندىقتى تالاپ ەتەمىن. شىندىققا كوز جەتكىزگىم كەلەدى”، – دەيدى ساۋلە جۇمانوۆا.
ايزات پەن ونىڭ كۇيەۋى ءۇش جىل بۇرىن شاڭىراق كوتەرگەن. ايزاتتىڭ ارتىندا 2 جاسار قىزى قالدى.
ءقازىر بۇل ىسكە قاتىستى جەتىسۋ وبلىسى پوليسياسى قىلمىستىق كودەكستىڭ “دەنساۋلىققا قاساقانا اۋىر زيان كەلتىرۋ” بابى بويىنشا تەرگەۋ جۇرگىزىپ جاتىر.
“قىلمىستىق ءىستى جان-جاقتى جانە وبەكتيۆتى تەرگەۋ ماقساتىندا بارلىق قاجەتتى ساراپتامالار تاعايىندالدى. تاراپتاردىڭ ۋاجدەرى مۇقيات تەكسەرىلەدى. كىنالى ادام زاڭ بويىنشا جاۋاپقا تارتىلادى”، – دەپ مالىمدەدى وبلىستىق پوليسيا دەپارتامەنتىنىڭ باسپا ءسوز قىزمەتىنەن بەكسۇلتان انەت ۇلى.
ايتا كەتەيىك، بۇعان دەيىن جەتىسۋ وبلىسىندا 32 جاستاعى ايەلدىڭ قازا تاپقانى تۋرالى جازعان ەدىك. مارقۇمنىڭ تۋىستارى كۇدىكتى ونىڭ كۇيەۋى ەكەنىن ايتادى.
قايعىلى وقيعا تۋرالى العاشقى اقپارات جۋرناليست ساندۋعاش دۇيسەنوۆانىڭ پاراقشاسىندا جاريالاندى. وقيعا اقسۋ اۋدانىنا قاراستى بالاساز اۋىلىندا ورىن العان.
"كۇيەۋى ونى اسا قاتىگەزدىكپەن ولتىرگەن. قاندى وقيعا ايزاتتىڭ ەكى جاسار قىزىنىڭ كوز الدىندا بولعان. الدىمەن ولاردىڭ اراسىندا جانجال شىققان. كەيىن بىرنەشە ساعات بويى اياۋسىز ازاپتاۋ جالعاسقان. ايزاتتىڭ دەنەسىندە ازاپتاۋدىڭ بەلگىسى بولعان – جابىق باسسۇيەك-مي جاراقاتى، ميىنىڭ ءىسىنۋى، باسسۇيەكتىڭ نەگىزىنىڭ سىنۋى، قول-اياق پەن جامباستىڭ كوپتەگەن سىنىعى، دەنەسىندە دورەكى بەتكەيمەن سۇيرەلگەن ىزدەر. تۋىستارى ونى ارقانمەن اتقا بايلاپ، دالادا سۇيرەگەن دەپ بولجايدى"، – دەپ جازدى جۋرناليست.
تۋىستارىنىڭ سوزىنشە، مارقۇمنىڭ دەنەسىندە ساۋ جەر قالماعان.
"پوليسيانىڭ مالىمەتىنشە، ايزات جۇمانوۆا 22 ماۋسىم كۇنى تۇنگى ساعات 02:30-دا تالدىقورعان قالالىق اۋرۋحاناسىنا جەتكىزىلگەن. جارتى ساعاتتان سوڭ دارىگەرلەر ونىڭ قايتىس بولعانىن راستاعان. الايدا تۋىستارى بۇعان سەنبەيدى. ولار ايزات سول ساتكە دەيىن-اق جان تاپسىرعان دەپ ەسەپتەيدى"، – دەپ جازدى دۇيسەنوۆا.
پوليسيا بۇل فاكتى بويىنشا ق ر قك 106-بابىنىڭ 3-بولىگىمەن "ابايسىزدا ولىمگە اكەپ سوققان اۋىر دەنە جاراقاتىن كەلتىرۋ" بابى بويىنشا قىلمىستىق ءىس قوزعاعان. الايدا تۋىستارى بۇل ءىستى "اسا قاتىگەزدىكپەن جاسالعان ادام ءولتىرۋ" بابىنا اۋىستىرۋدى تالاپ ەتتى.
