Memleket basshysynyń ókimimen Atom energıasy jónindegi agenttigi tóraǵasynyń osymen tórtinshi orynbasary taǵaıyndaldy. Bul laýazymǵa buǵan deıin "QazMunaıGaz" UK" AQ basqarma tóraǵasynyń orynbasary bolǵan Vasılıı Lavrenov keldi, dep habarlaıdy Dalanews.kz Aqordanyń baspasóz qyzmetine silteme jasap.
Atom energıasy jónindegi agenttik 2025 jyly naýryz aıynda jańadan qurylyp, onyń basshylyǵyna sol kezdegi Energetıka mınıstri Almasadam Sátqalıev taǵaıyndalǵan edi.
Lavrenov Vasılıı Sergeevıch 1979 jyly 17 qarashada dúnıege kelgen.
2000 jyly Qazaq memlekettik zań akademıasyn bitirdi. 2004 jyly Dúk ýnıversıtetiniń Quqyq mektebinde jáne Japonıanyń Kúsú ýnıversıtetinde Halyqaralyq quqyq mamandyǵy boıynsha bilim aldy.
Eńbek jolyn 1999 jyly "Tıtýl" zań agenttiginde zańger kómekshisi bolyp bastady, "GRATA" zań fırmasynda zańger bolyp jumys istedi. 2001-2002 jyldary "Qazatomónerkásip" UAK" AQ zań departamentinde zań keńesshisi bolyp qyzmet etti.
2005-2007 jyldary "Bateman Kazakhstan Oil and Gas Company B.V." Qazaqstandaǵy fılıalynyń zań bóliminiń bastyǵy, quqyqtyq máseleler boıynsha bas keńesshisi bolyp jumys istedi.
2007-2008 jyldary "Integra Menejment" JAQ (Qazaqstan Respýblıkasyndaǵy Ókildik) munaı kásipshiligine qyzmet kórsetý kompanıasynyń zań qyzmetiniń dırektory, 2008-2017 jyldary "Eastcomtrans" kompanıalar tobynyń zań departamentiniń dırektory, bas zań keńesshisi, 2019-2022 jyldary Greenline Services Ltd kompanıasynyń Býdapesht qalasyndaǵy aǵa seriktesi, keńesshisi laýazymyn atqarǵan.
2022 jyldyń mamyrynan bastap "QazMunaıGaz" UK" AQ basqarma tóraǵasynyń orynbasary qyzmetinde boldy.
