Almaty aýdanaralyq mamandandyrylǵan tergeý sotynda Igor Dýjnov adamdardy óltirgenine ókinetinin jetkizdi. Ol ózin mundai jaǵdaiǵa "sot oryndaýshysynyń zańsyz áreketi, zańsyzdyq pen sot júiesi" jetkizgenin málimdedi.
"Óz úiimdi, otbasymdy, balalarymdy qorǵaimyn dep affekt kúiinde ne istegenimdi túsinbedim. Buǵan ókinemin. Qurmetti sot, men jaýap berýden bas tartamyn. Budan artyq sóilei almaimyn", – dedi ol.
Dýjnovtyń advokaty sottan kúdiktiniń qaýipsizdigin qamtamasyz etý úshin sotty jabyq rejimde ótkizýdi surady. Alaida sot BAQ ókilderin qatystyrmaý týraly ótinishti qanaǵattandyrmady jáne onlain tyńdaýdy ashyq rejimde jalǵastyrý týraly sheshim qabyldady. Budan soń zańger sýdiaǵa qarsy narazylyǵyn jetkizdi. Advokat kúdiktiniń mekenjaiyn qupiia saqtap, kúzet berip, úiqamaqqa jiberý qajettigin aitty.
Alaida sýdia Janábil Aqynov protsess ashyq rejimde ótedi dep sheshti. Budan soń advokat sýdiany aýystyrýǵa ótinishhat jazdy, alaida ol qanaǵattandyrylmady.
Sýdia Janábil Aqynov Dýjnovty eki ai merzimge qamaýǵa alý týraly qaýly shyǵardy. Merzim ustalǵan ýaqyt 20 qyrkúiek saǵat 18:00-den bastap esepteledi.
Jýrnalisterge sot zalynda bolýǵa da, protsesti video bailanys arqyly kórýge de ruqsat berildi. Alaida material jariialaý úshin prokýror kelisimi qajet. Óz kezeginde prokýror BAQ bultartpaý sharasyn tańdaýǵa qatysty sot sheshimin ǵana jariialai alady dep sheshti.
Sondai-aq Almaty qalalyq soty budan buryn Dýjnovtyń aqsha alyp, qaitarmaǵan tanystary ony alty ret sotqa bergenin málimdedi. Tipti 18 ret jeke sot oryndaýshylary ony sotqa jaýapker retinde shaqyrǵan. Budan bólek, taǵy toǵyz ret onyń múlkine tyiym salýǵa jáne májbúrlep sotqa keltirýge tyrysqan.
"2014-2021 jyldary Igor Dýjnov alty azamattyq is boiynsha sotta jaýapker bolǵan. Ol uzaq ýaqyt boiy qaryzyn ótemegen: keibireýleri úsh, al basqalary úshin alty jyl. Sondyqtan eki adam odan jalpy somasy 6,5 million teńge qaryzdy óndirip alý úshin júgingen. Sonymen qatar, JSSh bes million teńgeni qaitarý týraly jáne bank 118 million teńgeni qaitarý týraly talap aryz bergen", – dedi Almaty qalalyq soty baspasóz qyzmetiniń mamany Nursultan Orynbasarov.
Onyń aitýynsha, úsh sot sheshimi boiynsha Dýjnovtan 130 millionǵa jýyq teńge óndirilgen.
Aita keteiik, buǵan deiin Almatylyq sot Igor Dýjnovtyń áieliniń shaǵymyn qaraýdy keiinge shegergen bolatyn.
20 qyrkúiek kúni Almatynyń Alataý aýdanyndaǵy Aqbulaq yqsham aýdanynda bes adamnyń óltirilgeni týraly belgili bolǵan. Resmi derekterge súiensek, sot sheshimin oryndaýshylar eki adamnyń menshik quqyǵyna qatysty daýǵa bailanysty kúdiktiniń úiine kelgen. Sot sheshimin estigen azamat úiinen qarý alyp shyǵyp, sot oryndaýshysyna, ýchaskelik politsiia inspektorlaryna jáne aýlada bolǵan basqa adamdarǵa qarýdan oq jaýdyrdy. Nátijesinde bes adam kóz jumǵan. Onyń ishinde úidiń jańa iesi men taǵy bir turǵyn bar.
Úide áielder men balalar bolǵandyqtan kúdiktini arnaiy jasaq qarý qoldanbai qolǵa túsirdi.
"Kisi óltirý" jáne "Bilik ókiline shabýyl jasaý" baptary boiynsha eki qylmystyq is qozǵaldy. 1967 jyly týǵan er azamat 20 jylǵa nemese ómir boiyna bas bostandyǵynan aiyrylýy múmkin.
https://www.youtube.com/watch?v=IDML3JQwxPA
