الماتى اۋدانارالىق مامانداندىرىلعان تەرگەۋ سوتىندا يگور دۋجنوۆ ادامداردى ولتىرگەنىنە وكىنەتىنىن جەتكىزدى. ول ءوزىن مۇنداي جاعدايعا "سوت ورىنداۋشىسىنىڭ زاڭسىز ارەكەتى، زاڭسىزدىق پەن سوت جۇيەسى" جەتكىزگەنىن مالىمدەدى.
"ءوز ءۇيىمدى، وتباسىمدى، بالالارىمدى قورعايمىن دەپ اففەكت كۇيىندە نە ىستەگەنىمدى تۇسىنبەدىم. بۇعان وكىنەمىن. قۇرمەتتى سوت، مەن جاۋاپ بەرۋدەن باس تارتامىن. بۇدان ارتىق سويلەي المايمىن"، – دەدى ول.
دۋجنوۆتىڭ ادۆوكاتى سوتتان كۇدىكتىنىڭ قاۋىپسىزدىگىن قامتاماسىز ەتۋ ءۇشىن سوتتى جابىق رەجيمدە وتكىزۋدى سۇرادى. الايدا سوت ب ا ق وكىلدەرىن قاتىستىرماۋ تۋرالى ءوتىنىشتى قاناعاتتاندىرمادى جانە ونلاين تىڭداۋدى اشىق رەجيمدە جالعاستىرۋ تۋرالى شەشىم قابىلدادى. بۇدان سوڭ زاڭگەر سۋدياعا قارسى نارازىلىعىن جەتكىزدى. ادۆوكات كۇدىكتىنىڭ مەكەنجايىن قۇپيا ساقتاپ، كۇزەت بەرىپ، ءۇيقاماققا جىبەرۋ قاجەتتىگىن ايتتى.
الايدا سۋديا ءجانابىل اقىنوۆ پروسەسس اشىق رەجيمدە وتەدى دەپ شەشتى. بۇدان سوڭ ادۆوكات سۋديانى اۋىستىرۋعا ءوتىنىشحات جازدى، الايدا ول قاناعاتتاندىرىلمادى.
سۋديا ءجانابىل اقىنوۆ دۋجنوۆتى ەكى اي مەرزىمگە قاماۋعا الۋ تۋرالى قاۋلى شىعاردى. مەرزىم ۇستالعان ۋاقىت 20 قىركۇيەك ساعات 18:00-دەن باستاپ ەسەپتەلەدى.
جۋرناليستەرگە سوت زالىندا بولۋعا دا، پروسەستى ۆيدەو بايلانىس ارقىلى كورۋگە دە رۇقسات بەرىلدى. الايدا ماتەريال جاريالاۋ ءۇشىن پروكۋرور كەلىسىمى قاجەت. ءوز كەزەگىندە پروكۋرور ب ا ق بۇلتارتپاۋ شاراسىن تاڭداۋعا قاتىستى سوت شەشىمىن عانا جاريالاي الادى دەپ شەشتى.
سونداي-اق الماتى قالالىق سوتى بۇدان بۇرىن دۋجنوۆتىڭ اقشا الىپ، قايتارماعان تانىستارى ونى التى رەت سوتقا بەرگەنىن مالىمدەدى. ءتىپتى 18 رەت جەكە سوت ورىنداۋشىلارى ونى سوتقا جاۋاپكەر رەتىندە شاقىرعان. بۇدان بولەك، تاعى توعىز رەت ونىڭ مۇلكىنە تىيىم سالۋعا جانە ماجبۇرلەپ سوتقا كەلتىرۋگە تىرىسقان.
"2014-2021 جىلدارى يگور دۋجنوۆ التى ازاماتتىق ءىس بويىنشا سوتتا جاۋاپكەر بولعان. ول ۇزاق ۋاقىت بويى قارىزىن وتەمەگەن: كەيبىرەۋلەرى ءۇش، ال باسقالارى ءۇشىن التى جىل. سوندىقتان ەكى ادام ودان جالپى سوماسى 6،5 ميلليون تەڭگە قارىزدى ءوندىرىپ الۋ ءۇشىن جۇگىنگەن. سونىمەن قاتار، جسش بەس ميلليون تەڭگەنى قايتارۋ تۋرالى جانە بانك 118 ميلليون تەڭگەنى قايتارۋ تۋرالى تالاپ ارىز بەرگەن"، – دەدى الماتى قالالىق سوتى باسپا ءسوز قىزمەتىنىڭ مامانى نۇرسۇلتان ورىنباساروۆ.
ونىڭ ايتۋىنشا، ءۇش سوت شەشىمى بويىنشا دۋجنوۆتان 130 ميلليونعا جۋىق تەڭگە وندىرىلگەن.
ايتا كەتەيىك، بۇعان دەيىن الماتىلىق سوت يگور دۋجنوۆتىڭ ايەلىنىڭ شاعىمىن قاراۋدى كەيىنگە شەگەرگەن بولاتىن.
20 قىركۇيەك كۇنى الماتىنىڭ الاتاۋ اۋدانىنداعى اقبۇلاق ىقشام اۋدانىندا بەس ادامنىڭ ولتىرىلگەنى تۋرالى بەلگىلى بولعان. رەسمي دەرەكتەرگە سۇيەنسەك، سوت شەشىمىن ورىنداۋشىلار ەكى ادامنىڭ مەنشىك قۇقىعىنا قاتىستى داۋعا بايلانىستى كۇدىكتىنىڭ ۇيىنە كەلگەن. سوت شەشىمىن ەستىگەن ازامات ۇيىنەن قارۋ الىپ شىعىپ، سوت ورىنداۋشىسىنا، ۋچاسكەلىك پوليسيا ينسپەكتورلارىنا جانە اۋلادا بولعان باسقا ادامدارعا قارۋدان وق جاۋدىردى. ناتيجەسىندە بەس ادام كوز جۇمعان. ونىڭ ىشىندە ءۇيدىڭ جاڭا يەسى مەن تاعى ءبىر تۇرعىن بار.
ۇيدە ايەلدەر مەن بالالار بولعاندىقتان كۇدىكتىنى ارنايى جاساق قارۋ قولدانباي قولعا ءتۇسىردى.
"كىسى ءولتىرۋ" جانە "بيلىك وكىلىنە شابۋىل جاساۋ" باپتارى بويىنشا ەكى قىلمىستىق ءىس قوزعالدى. 1967 جىلى تۋعان ەر ازامات 20 جىلعا نەمەسە ءومىر بويىنا باس بوستاندىعىنان ايىرىلۋى مۇمكىن.
https://www.youtube.com/watch؟v=IDML3JQwxPA
