Almaty oblysynda qamaýǵa alynǵan Hasan Qasymbaevtyń isine qatysty tyń derekter paida boldy, dep habarlaidy Dalanews.kz.
Oblys politsiiasynyń habarlaýynsha, 2021 jyldyń maýsymynda A. esimdi azamattyń densaýlyǵyna qasaqana aýyr ziian keltirip, sol kisini urlady degen kúdikpen bes azamat ustalǵan.
"Olar Almaty oblysynyń qylmystyq ister jónindegi mamandandyrylǵan aýdanaralyq soty shyǵarǵan úkim negizinde sottalyp, qazir jazasyn bas bostandyǵynan aiyrý oryndarynda ótep jatyr.
Jedel-tergeý is-sharalarynyń nátijesinde, joǵaryda atalǵan qylmystyq áreketterge qatysy bar degen kúdikpen 2024 jyldyń 2 qarashasynda Qasymbaev ustalyp, ýaqytsha ustaý izoliatoryna qamaldy. Qylmystyń barlyq mán-jaiyn jan-jaqty, tolyq jáne obektivti tergeýdi qamtamasyz etý úshin tergeý áreketteriniń kesheni jalǵasyp jatyr", – dep habarlady politsiia.
Is materialdary bultartpaý sharasyn sanktsiialaý úshin sotqa jiberildi.
Aita keteiik,2 qarashada talǵarlyq Sherzat Bolattyń óliminen keiin aty qyzý talqyǵa túsken "hýtorlyq" Hasan ustalǵanyn birneshe media habarlaǵan edi.
"Chemodan gossekretov" telegram arnasynyń málimetinshe, Hasan Qasymbaev ýaqytsha ustaý izoliatorynda otyr. Alaida derekkóz málimetinshe, Hasanbaev 2021 jyly jasaǵan qylmysy úshin (densaýlyqqa aýyr ziian keltirý isi boiynsha) ustalǵan.
Eske salaiyq, buǵan deiin marqum Sherzattyń isinde “Hýtor” bandasynyń jetekshisi retinde aty shyqqan Hasan Qasymbaev qylmys jasaǵan kúdiktilerdi tanymaitynyn jetkizdi.
Qasymbaev “Hýtorlyqtar” degen qylmystyq topqa esh qatysy joq ekenin jáne bul aqparattyń shyndyqqa janaspaitynyn alǵa tartty.
“Bul tek ósek-aiań, áleýmettik jeli qoldanýshylary oidan shyǵarǵan jala. Turar Rysqulov aýyly buryn Hýtor dep atalǵan. Soǵan bailanysty eldiń bári osy ataýmen atap ketken. Men ol jerden 2015 jyly kóship kettim. Meni nege qylmystyq toptyń jetekshisi dep ataitynyn túsinbeimin. Zańdy eshqashan buzǵan emespin. Sottalmaǵanmyn. Adal jumys istep júrgen adammyn”, - deidi ol Orda.kz agenttigine bergen suqbatynda.
Osy tusta ol marqum Sherzattyń otbasyn jáne qylmys jasady dep aiyptalyp jatqan kúdiktilerdi de tanymaitynyn atap ótti.
“Bul óte qaiǵyly jaǵdai. Men onyń ata-anasyna kóńil aitamyn. Balany ata-anasynyń jerleýi — kez kelgen adam úshin aýyr tragediia. Mundaidy jaýyńa da tilemeisiń. Men Sherzat pen onyń ata-anasyn tanymaimyn, sebebi aýyldan 2015 jyly kóship ketkenmin.
Al qylmys jasaǵandar 1998-2000 jylǵy balalar eken. Olardy da bilmeimin. Biraq áke-sheshelerin tanýym múmkin”, - dedi ol.
Alaida “halyq aitsa, qalyp aitpaidy” degen áleýmettik jeli qoldanýshylary atyshýly “Hýtorlyqtarǵa” qatysty túrli pikirdi jappai jazyp jatyr.
“Osyǵan senesińder me? Sol Talǵardyń myńdaǵan turǵyny ótirik aityp otyr ma, oilap qarańdarshy?! Bul - 30 jyldan beri qordalanǵan másele. Endi kelip búkil el qulaqtanǵan soń qimyldap jatyr. Jergilikti quqyq qorǵaý organdary, ákimshilik, bilik ókilderi bilmeidi emes... Jabýly qazan jabýly turǵan, sondyqtan óte-móte aiaǵyna deiin isti jetkizý kerek. Al osyndai “baidyń balalary” basqa jerde joq degenge de eshkim senbeidi. IIM, Prokýratýra búkil Qazaqstannyń 20 mln halqy sizderden nátije kútip otyr”, - deidi áleýmettik jeli qoldanýshysy.
Taǵy biri “jel turmasa, shóptiń basy qimyldamaidy”, “uiymdasqan qylmystyq top bolmasa, jábirlenýshiniń úiin órtep kete me?”, “aqsaq qoi tústen keiin mańyraidy” degen pikirler qaldyrǵan.
Buǵan deiin Hasan Qasymbaev óziniń ar-namysy men abyroiyn qorǵaý maqsatynda marqum balanyń ákesine jáne taǵy basqa tulǵalarǵa qarsy aryz daiyndap, Talǵar aýdandyq sotyna tapsyrǵan edi.
Hasannyń aitýynsha, onyń atyna taǵylǵan aiyptar men qoǵamdaǵy áńgimeler shyndyqqa janaspaidy. Ol qarapaiym turmystyq tóbelesti uiymdasqan qylmystyq toptardyń arasyndaǵy qaqtyǵys retinde kórsetýge tyrysyp jatyr degen pikirde.
Kasymbaevtyń pikirinshe, ony atyshýly qylmystyq toppen bailanystyrý negizsiz. Álgi aryzda ol eshqashan kisi óltirýge qatysty jastardy kórmegenin, bilmegenin jáne olardyń áreketterine eshqandai qatysy joq ekenin málimdegen.
Hasan kez kelgen qoǵamdyq alańda, tipti BAQ arqyly óziniń kinásizdigin dáleldeýge daiyn ekenin basa aitqan. Onyń oiynsha, bul oqiǵa qarapaiym turmystyq janjal bolǵan, biraq ony ádeii burmalap, úlken qylmystyq astar qosyp, onyń atyna kir keltirmekshi.
Buǵan deiin BAQ betteri men álemjelide marqum Sherzat pen onyń otbasyna shabýyl jasaǵan bir top buzaqynyń "Hýtor" atty jergilikti bandymen bailanysy bar degen aqpar taraǵan edi. Birneshe derekkóz toptyń tóbe basynda Hasan esimdi azamattyń turǵanyn jazǵan.
Almaty oblystyq politsiia departamenti Sherzattyń ólimine kúdikti retinde ustalǵan jeti adamnyń uiymdasqan qylmystyq esh qatysy joǵyn jetkizgen.
