Oǵan qylmystyq kodekstiń 366-babynyń 4-bóligi – asa iri mólsherde aqsha túrinde para aldy degen aiyp taǵylǵan.
Astana qalasynyń qylmystyq ister jónindegi mamandandyrylǵan aýdanaralyq soty taratqan aqparatqa sáikes, Nurjan Áltaev 2018 jyldyń aqpanynan 2020 jyldyń shildesine deiin «Atameken» UKP múddeleri úshin tiimdi resmi sheshim qabyldaýǵa yqpaldasyp, deldal arqyly Abylai Myrzahmetovten para retinde jalpy somasy 50 mln teńgeden astam (115 myń AQSh dollary jáne 8 mln 150 myń teńge) aqshalai qarajat aldy dep aiyptalyp otyr.
Qylmystyq is 15 tomnan turady, is boiynsha 18 kýáger bar. Buǵan deiin Sybailas jemqorlyqqa qarsy is-qimyl agenttigi 2023 jyldyń 7 maýsymynda eks-vitse-ministr Nurjan Áltaevty asa aýyr jemqorlyq qylmysyn jasady degen kúdikpen ustady.
«Áltaev 2018-2019 jyldar aralyǵynda Eńbek jáne halyqty áleýmettik qorǵaý vitse-ministri bola tura, júieli túrde «Atameken» ulttyq kásipkerler palatasynyń basqarma tóraǵasy Abylai Myrzahmetovten para retinde ai saiyn 5 000 AQSh dollary mólsherinde aqsha qarajatyn alyp otyrdy degen kúdikke ilindi.Keiinnen Áltaev 2019-2020 jyldar aralyǵynda Parlament májilisiniń depýtaty laýazymyn atqaryp, Myrzahmetovten para alýyn jalǵastyrǵan. Jalpy alǵanda, ol para retinde 135 000 AQSh dollaryn aldy.Alynǵan para Nátijeli jumyspen qamtýǵa jáne jappai kásipkerlikti damytýǵa arnalǵan «Eńbek» memlekettik baǵdarlamasy boiynsha memlekettik tapsyrysty alýǵa járdemdesýge, sondai-aq Áltaev jetekshilik etetin salalarda Myrzahmetovke jalpy qamqorlyq jáne múddelerine lobbi jasaýǵa baǵyttalǵan», – delingen agenttik taratqan aqparatta.
Aita keteiik, Sybailas jemqorlyqqa qarsy qyzmet 10 mamyrda «Atameken» Ulttyq kásipkerler palatasynyń burynǵy basqarma tóraǵasy Abylai Myrzahmetovti ustady.
