وعان قىلمىستىق كودەكستىڭ 366-بابىنىڭ 4-بولىگى – اسا ءىرى مولشەردە اقشا تۇرىندە پارا الدى دەگەن ايىپ تاعىلعان.
استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى تاراتقان اقپاراتقا سايكەس، نۇرجان التايەۆ 2018 جىلدىڭ اقپانىنان 2020 جىلدىڭ شىلدەسىنە دەيىن «اتامەكەن» ۇكپ مۇددەلەرى ءۇشىن ءتيىمدى رەسمي شەشىم قابىلداۋعا ىقپالداسىپ، دەلدال ارقىلى ابىلاي مىرزاحمەتوۆتەن پارا رەتىندە جالپى سوماسى 50 ملن تەڭگەدەن استام (115 مىڭ اقش دوللارى جانە 8 ملن 150 مىڭ تەڭگە) اقشالاي قاراجات الدى دەپ ايىپتالىپ وتىر.
قىلمىستىق ءىس 15 تومنان تۇرادى، ءىس بويىنشا 18 كۋاگەر بار. بۇعان دەيىن سىبايلاس جەمقورلىققا قارسى ءىس-قيمىل اگەنتتىگى 2023 جىلدىڭ 7 ماۋسىمىندا ەكس-ۆيسە-مينيستر نۇرجان التايەۆتى اسا اۋىر جەمقورلىق قىلمىسىن جاسادى دەگەن كۇدىكپەن ۇستادى.
«التايەۆ 2018-2019 جىلدار ارالىعىندا ەڭبەك جانە حالىقتى الەۋمەتتىك قورعاۋ ۆيسە-مينيسترى بولا تۇرا، جۇيەلى تۇردە «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ابىلاي مىرزاحمەتوۆتەن پارا رەتىندە اي سايىن 5 000 اقش دوللارى مولشەرىندە اقشا قاراجاتىن الىپ وتىردى دەگەن كۇدىككە ءىلىندى.كەيىننەن التايەۆ 2019-2020 جىلدار ارالىعىندا پارلامەنت ءماجىلىسىنىڭ دەپۋتاتى لاۋازىمىن اتقارىپ، مىرزاحمەتوۆتەن پارا الۋىن جالعاستىرعان. جالپى العاندا، ول پارا رەتىندە 135 000 اقش دوللارىن الدى.الىنعان پارا ناتيجەلى جۇمىسپەن قامتۋعا جانە جاپپاي كاسىپكەرلىكتى دامىتۋعا ارنالعان «ەڭبەك» مەملەكەتتىك باعدارلاماسى بويىنشا مەملەكەتتىك تاپسىرىستى الۋعا جاردەمدەسۋگە، سونداي-اق التايەۆ جەتەكشىلىك ەتەتىن سالالاردا مىرزاحمەتوۆكە جالپى قامقورلىق جانە مۇددەلەرىنە لوببي جاساۋعا باعىتتالعان»، – دەلىنگەن اگەنتتىك تاراتقان اقپاراتتا.
ايتا كەتەيىك، سىبايلاس جەمقورلىققا قارسى قىزمەت 10 مامىردا «اتامەكەن» ۇلتتىق كاسىپكەرلەر پالاتاسىنىڭ بۇرىنعى باسقارما ءتوراعاسى ابىلاي مىرزاحمەتوۆتى ۇستادى.
