Parijdegi "genderlik" janjal jańa málimettermen tolyǵý ústinde. Atyshýly aljirlik boksshy Iman Heliftiń jynysyn aýystyrmaǵany, áýelden áiel bop jaratylǵany belgili boldy, - dep habarlaidy Dalanews.kz.
Voice of America agenttiginiń málimetinshe, aljirlik boksshyny qaralaý operatsiiasyn Máskeý uiymdastyrǵan. "Iman Helif tap-taza trans, eks-erkek, sol sebepti sharshy alańdaǵy qarsylasynan mysy da, kúshi de basym" degen aqparat Pútinge jaqyn fýnktsionerdiń aýzynan taraǵan.
Sonda mundaǵy motiv nede?
"Motiv? Osydan bir jarym jyl shamasy buryn Halyqaralyq boks assotsiatsiiasy (IBA, burynǵy AIBA) uiymdastyrǵan Niý-Delidegi álem chempionatynda naq osy Iman Helif buryn-sońdy tumsyǵy qanamaǵan reseilik boksshy Azaliia Aminevany tas-talqan qyp utady. Úsh kún ótkesin IBA Imanǵa sanktsiia salyp, jarystan shettetedi. Osylaisha úsh kún buryn ǵana aljirlik boksshydan oisyrai utylǵan Aminevanyń minsiz statistikasy qaitadan qalpyna keledi", - deidi Ámirika daýysy.
IBA basshylyǵy Heliftiń irikteý kriteriine sai emesin aityp, dene turqy, basqa da kórsetkishter boiynsha ózge sportshylardan bir bas joǵary turǵanyn málimdeidi. Buǵan qosa Heliftiń genderlik testten ótpegenin jariia etedi. Parijdegi daý da osydan tutanǵany esińizde bolar...
IBA? Olimp oiyndaryna qatysýdan ómirbaqiǵa shettetilgen qaýymdastyqty qazirgi kúni Resei bilep-tóstep tur. Batys basylymdarynyń paiymdaýynsha Máskeýdiń sýmaqai saiasaty aralasqan ortada ádildik atty túsinik defitsitke ushyraidy.
"Helif? Halyqtyń basym kópshiligi IBA taratqan aqparatqa shúbásiz senip, aldanyp qaldy. Shyn máninde, Halyqaralyq Olimpiada komiteti (HOK) men IBA arasyndaǵy arazdyq búgin ǵana ýshyqqan joq. Eki tarap sońǵy on jyl boiy it pen mysyq sekildi eregesip keledi. Olimpiada komiteti áýel bastan Helifke qatysty aqparattyń shyǵý tegine, qainar kózine úńilýdi suraǵan bolatyn. Aljirlik boksshy IBA-nyń koridorynan taraǵan jalǵan málimettiń qurbany boldy" deidi osy tusta Ámirika daýysy.
Batys elderi boksshylarǵa arnalǵan jańa orǵan World Boxing-ti qurýǵa áreket etýde.
IBA týraly az-kem aqparat bere ketsek: bertinge deiin AIBA dep atalyp kelgen uiym 2019 jyly atyn ózgertip, qaýymdastyq basshylyǵyna Kreml kóseminiń jaqyn tanysy Ýmar Kremlev taǵaiyndalǵan. Kremlev "Gazpromdy" eń iri demeýshi retinde tartyp, uiymdy Reseiden basqarylatyn qurylymǵa ainaldyrǵan.
Halyqaralyq Olimpiada komitetiniń talaptaryn kózge ilmeý, eskertýin elemeý qalypty úrdiske ainalǵan. Aqyr sońy HOK IBA-ny olimpiadalyq ókiletinen birjola aiyryp tynǵan edi.
"Munyń esesin qaitarǵysy kelgen Kremlev Parijdegi jarystyń shyrqyn buzyp, Helifke qatysty aiǵai-shýdy órshite tústi. Kremlev boksshynyń jynysy týraly qosymsha málimdemeler jasady, biraq dálel keltirmedi, jurt onyń sózine ilanyp qaldy.
Boks ardagerleriniń aitýynsha IBA-nyń Helifty Niý-Delidegi jarystan shettetýi negizsiz bolǵan. Aljirlik boksshy qaýymdastyqtyń osyǵan deiingi jarystaryna esh kedergisiz qatysqan.
Kremlov? Reseilik fýnktsioner basshylyq etetin uiym Máskeýdiń propaganda quralyna ainalyp ketti. Pútinniń jaqyn dosy Olimpiada oiyndaryn keleke qylýdan qoly bosar emes, kúni keshe ǵana ol HOK prezidenti Tomas Bahty "sháitánǵa" teńedi", - deidi Ámirika daýsy.
