Memleket basshysy Qasym-Jomart Toqaev halyqqa Joldaýynda esirtkiniń, onyń ishinde sintetikalyq esirtkiniń taralýy – bolashaq urpaqtyń jaǵdaiyna qaýip tóndirip otyrǵandyǵyn, esirtkige qarsy kúresti kúsheitýdi tapsyrǵany barshamyzǵa belgili, - dep habarlaidy Dalanews.kz.
Búginde jastar men jasóspirimder arasynda sintetikalyq esirtkige qumarlyq órship barady. Osy rette, jas urpaqtyń sanasyn ýlaǵan psihotropty dertpen kúreste atyraýlyq politsiia qyzmetkerleri tarapynan birqatar sharalar josparlanyp, jumys atqarylyp keledi. Máselen, jyl basynan beri atyraýlyq politseiler esirtkige qarsy turaqty immýnitetti qalyptastyrý, esirtkini qoldanýdyń densaýlyqqa ziiandylyǵyn túsindirý boiynsha 500-ge jýyq profilaktikalyq is-shara ótkizgen.
Atyraý oblysy politsiia departamenti Esirtki qylmysyna qarsy is-qimyl basqarmasynyń jedel ýákili politsiia kapitany Adlan Nuridenovtyń aitýynsha, Politsiia departamenti ákimdikpen jáne prokýratýramen, sondai-aq memlekettik úkimettik emes uiymdarmen birlesip nashaqorlyqqa qarsy is-sharalar keshenin turaqty negizde iske asyryp keledi.
"Geroin men marihýana siiaqty "dástúrli" esirtkilerdi qara naryqtan shyǵarǵan saiyn arzan ári tez daiyndalatyn sintetikalyq esirtki óndirisi jandanyp tur. Al esirtkiniń bul túrin qoldaný – jas urpaqtyń ómiri úshin orasan zor qaýip. Sebebi mundai sintektikalyq esirtkini qoldanǵan jastarda esirtkige táýeldilik qaýpi basym.
Qazirgi sintetikalyq zattar ekinshi qoldanýdan bastap turaqty táýeldilikti týdyrýy múmkin. Ony qoldanǵan adamdarda psihologiialyq jáne fizikalyq táýeldilik bar. Bir sózben aitqanda, ony qoldanǵan adam bir sátte bul álemnen ózin-ózi joǵaltady. Sol sebepti esirtkige qarsy aldyn alý sharalaryn turaqty túrde ásirese jastar arasynda júrgizý biz úshin mańyzdy", - dep atap ótti politsiia kapitany.
Atyraýlyq politseiler esirtki quraldaryn, psihotroptyq zattardy, sol tektesterdi nasihattaǵany jáne zańsyz jarnamalaǵany úshin QR Qylmystyq kodekstiń 299-1-baby boiynsha qylmystyq jaýapkershilik kózdelgendigi jóninde eskertedi!
