Búgin tańǵy saǵat 06:00 shamasynda H.Dosmuhamedov atyndaǵy Atyraý ýniversitetiniń №2 jataqhanasy ǵimaratynyń ortańǵy bóligi opyrylyp tústi,- dep habarlaidy Dalanews.kz Óńirlik kommýnikatsiialar qyzmetine silteme jasap.
Zardap shekkender men qaza tapqandar tirkelgen joq.
"Stýdentter dańǵyly,29 mekenjaiynda ornalasqan ǵimarat 1972 jyly salynǵan. 2022 jyldyń qarasha aiynda ýniversitettiń sharýashylyq bólimi birinshi qabattyń qabyrǵasynan aqaý anyqtap, bul jóninde tiisti organdarǵa habarlaǵan. Artynsha Atyraý oblysynyń Memlekettik sáýlet-qurylys baqylaý basqarmasynyń mamandary ǵimaratqa tehnikalyq zertteý júrgizip, ony apatty ári turýǵa qaýipti dep tanydy. Osyǵan bailanysty 2023 jylǵy 1 aqpannan beri bul jataqhanada eshkim turmaidy", - delingen habarlamada.
Qazirgi ýaqytta Atyraý oblysynyń Qurylys basqarmasy ýniversitetpen birlesip, apatty qos jataqhanany buzyp, ornyna 900 adamǵa arnalǵan zamanaýi jańa jataqhana salýdy qolǵa aldy. Jobalyq-smetalyq qujattamany «Avangard-OK» JShS ázirlegen. Qujattama qazirgi ýaqytta memlekettik saraptamadan ótýde.
