Atyraýdaǵy qylmystyq ister boiynsha 2-sotta azamattyq belsendiler Maks Boqaev pen Talǵat Aiannyń ústinen qozǵalǵan "bilikti kúshpen basyp alý" isi boiynsha sottyń aldyn ala tyńdaýy bastaldy.
Sotqa oblys turǵyndary men ózge aimaqtardan kelgen quqyq qorǵaýshylar da qatysty. Sot májilisiniń shaǵyn zalyna jurttyń birazy syimai qaldy. Olardyń arasynda Atyraý oblysynyń alys aýdandarynan kelgen adamdar da boldy. Solardyń biri zeinetker Shynar Omarova qyzymen birge Atyraýdan 300 kilometr jerdegi Qulsary qalasynan belsendilerdi qoldaýǵa kelgen.
– 24 sáýirde bolǵan «sheteldikterge jerimizdi satýǵa bolmaidy» degen miting beibit túrde óte mádenietti ótti dep sanaimyn. Biz sotty bolǵan Maks pen Talǵatty tanymaimyz, óz júrek qalaýymyzben keldik. Olar bizdi mitingige shaqyrǵan joq, ózimiz bardyq. Biz ózimizdiń jerimizde urpaǵymyzdy emin-erkin tárbielep júrgimiz keledi. Sottan ádildik suraimyz, – deidi ol.
Sotqa sýdia Gúlnár Dáýleshova tóraǵalyq etip otyr. Baqylaý kúsheitilgen sot ǵimaratyna kelgen BAQ ókilderine zaldan foto jáne beine jazba túsirýine bes minýtqa ǵana ruqsat berilip, odan soń bólek bólmege shyǵaryp jiberdi.
Sýdia Gúlnár Dáýleshova. Atyraý, 12 qazan 2016 jyl.
Sot bastalǵanda Boqaev pen Aiannyń advokaty Tólepqali Aianov sýdia Gúlnár Dáýleshovany isten shettetý týraly ótinish jasady. Tólepqali Aianov sot tergeýiniń aiyptaý aktisi 30 qyrkúiekte daiyn bolǵanymen, 3 qazanda jariialanǵanyn, al is materialdary 73 tomnan turatyndyqtan osy aralyqta sottyń onymen tanysyp shyǵýy múmkin bolmaǵanyn aitty.
- Sýdia aiyptaý aktisi shyqqan soń ony birden reestrge engizýi tiis edi, biraq ony ýaqytynda engizbegen. Bul sot isin falsifikatsiialaý dep sanalatyndyqtan sýdiany isten shettetýdi suraimyn, - dedi advokat.
Budan soń sýdia ótinishke qatysty sheshim qabyldaý úshin bes minýttyq úzilis jariialady. Úzilisten soń sotqa ózin Dúisebalieva dep tanystyrǵan sýdia kelip, advokattyń ótinishi qanaǵattandyrylmaitynyn aityp, sot zalynan shyǵyp ketti. Osy kezde Maks Boqaev "Eshnárse estilgen joq, sýdia durys oqymady" dep narazylyǵyn bildirdi.
Bul oqiǵaǵa Maks Boqaevtyń qaryndasy ári qorǵaýshysy Janar Boqaeva da narazy boldy.
– Sýdia sot zalyna júgirip kirip, túsiniksiz áldeneni oqi bastady. Ózin tanystyrmastan, taraptardyń pikirin tyńdamastan qaýlyny oqyp shyqty. Bul osylai jasamaý kerektigi týraly úlgi bolsa kerek. Biz sottardyń ókilettiligi týraly másele kóteremiz, – dedi ol.
Bul sýdia aqyryn sóilegendikten ne aitqany sot barysyn ózge bólmede monitor arqyly baqylap otyrǵan jýrnalisterge durys estilmedi. Budan soń sotta úzilis jariialandy.
Atyraýdaǵy qylmystyq ister boiynsha 2-sot.
Maks Boqaev pen Talǵat Aian 24 sáýir kúni Atyraý qalasynda jer reformasyna qarsylyq retinde ótken jappai mitingten soń qamaýǵa alynǵan. Maks Boqaev pen Talǵat Aianǵa birqatar qylmystyq baptar (sonyń ishinde "alaýyzdyq týdyrý", "zańsyz miting uiymdastyrý") boiynsha aiyptary taǵylǵan. Azamattyq belsendiler bul aiyptardyń eshqaisysyn moiyndaǵan joq. Qamaýdaǵy Maks Boqaevtyń týystary onyń densaýlyǵyna alańdaidy.
10 qazanda Human Rights Watch halyqaralyq uiymynyń Eýropa jáne Ortalyq Aziia boiynsha ókili "Maks Boqaev pen Talǵat Aian qarsylyq bildirý quqyǵyn paidalanǵany úshin de, ózgelerdi qarsylyq bildirýge shaqyrǵany úshin de qamalmaýy tiis. Úkimet saiasatyna qarsylyǵyn bildirý - qylmys emes" dep málimdegen.
Derekkóz: Azattyq
