Atyraýda jasóspirim qyzdan jyn shyǵarmaq bolǵan emshi Keiqýat Ospanovqa qatysty tergeý amaldary júrgizilip jatyr. Bul týraly Bas prokýrordyń orynbasary Ǵalymjan Qoigeldiev málimdedi, dep habarlaidy Dalanews.kz.
“Bul is boiynsha tekserý jalǵasýda. Qazirgi tańda ony ákimshilik jaýapkershilikke tartý múmkindigi qarastyrylyp jatyr”, — dedi Ǵalymjan Qoigeldiev.
Sonymen qatar ol balanyń ata-anasynan eshqandai shaǵym túspegenin alǵa tartty.
Eske salaiyq, buǵan deiin áleýmettik jelide kishkentai qyzdan “jyn shyǵaryp“ jatqan video tarady. Bul másele quzyrly organdardyń nazaryn aýdartty.
Kadrlarda er adam qyzdyń esimin, jynysyn, ne úshin kirgenin, kim jibergenin, jasyn suraidy.
“19-daǵy Lázzat, myń jyldyqsyń ba, júz jyldyqsyń ba? Ishińde nesheý?” — dep suraidy er adam kishkentai qyzdan.
Videoda qyz suraqtarǵa jaýap berip, jylap jatqany kórinedi.
BAQ pen jelide videodaǵy emshiniń esimi Keiqýat Ospanov ekeni aitylady.
Máselege Bala quqyqtary jónindegi ýákil Dinara Zákieva pikir bildirdi.
“Emshi kámeletke tolmaǵan balaǵa rásim jasaǵan beinejazbaǵa qatysty. Atalmysh is boiynsha IIM, óńirlik ýákildermen jumys istep jatyrmyz. Emshiniń jeke basy men balanyń turyp jatqan jeri aldyn ala anyqtaldy. Aqparat tekserilip, mán-jai anyqtalýda”, — dedi ol.
Aita keteiik, atalǵan oqiǵaǵa bailanysty oqý-aǵartý ministrligi de málimdeme jasaǵan edi.
Ministrlik atalǵan jait úlken alańdaýshylyq týdyrǵanyn erekshe atap ótti.
“Atyraý oblysynda bolǵan oqiǵaǵa bei-jai qaraýǵa bolmaidy. QR Oqý-aǵartý ministrligi Balalardyń quqyqtaryn qorǵaý komiteti bul jaǵdaidy óz baqylaýyna aldy”, – dep habarlady ministrliktiń Balalar quqyqtaryn qorǵaý komitetiniń baspasóz qyzmeti.
Vedomstvonyń málimetinshe, qazirgi ýaqytta balaǵa qajetti kómek, sonyń ishinde kásibi psihologiialyq qoldaý kórsetilip jatyr. Sonymen qatar oqiǵa ornynda balalar quqyqtary jónindegi aimaqtyq ýákil jumys istep jatyr.
“Bala densaýlyǵy men ál-aýqatyna qaýip tóndiretin kez kelgen áreketke jol berilmeitinin erekshe atap ótken jón. Ministrlik balalardyń quqyqtaryn qorǵaýǵa baǵyttalǵan zańdar men normalardy qatań saqtaý qajettigin eske salady”, – dep qorytyndylady komitet ókilderi.
