Belgili jýrnalist Janat Moldashova áleýmettik jelidegi paraqshasynda Atyraý oblysynda bolǵan qaiǵyly oqiǵaǵa qatysty jańa videony jariialady, dep habarlaidy Dalanews.kz.
"Qaraly otbasy myna jaýyzdyqtan esterin jiia almai jatyr. Jangeldin halqy úreide otyr. Aǵaiyn-týys qaskói qylmyskerdi tezirek quryqtaýdy talap etedi. "Marqumdar saraidan qalai tabyldy? Oǵan deiin tintý júrgizildi ǵoi" degen suraqpen myńdaǵan adam mazalady. Oqiǵa bastalǵaly basy-qasynda júrgen, marqum Maqsot aǵamyzdyń inisi Shalqar biraz saýaldaryma jaýap berdi. Óte aýyr jaǵdai. Biraq qoǵamnyń tragediiasy bolǵandyqtan aitylýy, jazylýy kerek. Qazaly otbasynyń týystaryna qandai jubatý sóz aitaryńdy da bilmeisiń?!" – dep jazdy Janat Moldashova.
Keiinirek jelide jýrnalist Maqsot Qarabalinniń inisi Shalqar Muqanǵalievpen júrgizgen suhbaty da jaryq kórdi. Onda ol istiń mán-jaiyna qatysty tyń derektermen bólisken.
"Násip jeńgemizdiń aǵaiyn-týystarynyń chattaryna jibergen aýdiosy bar. Sol aýdio habarlamalarynyń birin 7 qarasha kúni jibergen. Kúdik týdyrmas úshin... Qalai bolǵanda da, bireý jiberip tur... Qazirgi tańda telefonnyń bári Sultanda boldy dep tur ǵoi. Sol Sultan jiberip turǵan shyǵar dep oilap turmyz", – dedi Shalqar Muqanǵaliev.
Eske salaiyq, Jangeldin aýylynan shyqqan otbasy 2025 jyly jumbaq jaǵdaida joǵalyp ketken bolatyn. 6 qańtarda Atyraý oblysynda joǵalǵan otbasynyń eki múshesiniń - otaǵasy Maqsot Qarabalinniń jáne onyń jubaiy Násip Úteshqalievanyń máiitteri tabylǵany habarlandy. Keiinirek is boiynsha kúdiktilerdiń jeke basy anyqtaldy.
7 qańtarda qylmysqa qaza tapqandardyń kúieý balasy, 29 jastaǵy Sultan Sársemáliev kúdikti retinde tanylǵany belgili boldy. Al 8 qańtarda onyń resmi túrde izdeýge jariialanǵany habarlandy.
