Atyraý oblysynyń Qyzylqoǵa aýdandyq sotynda abaisyzda adam ólimine ákep soqqan jol qozǵalysy erejelerin buzǵan politsiiaǵa qatysty qylmystyq is qaraldy, dep habarlaidy Dalanews.kz.
"Qyzylqoǵa aýdany Politsiia bólimi patrýldik politsiia tobynyń inspektory áriptesimen birge qyzmettik avtokólikpen kele jatyp, artyna bir bala mingestirip alǵan mototsikl júrgizýshisin toqtatqysy kelgen. Dybys belgisi arqyly toqtaýdy talap etken. Alaida jasy kámeletke tolmaǵan júrgizýshi politsiia qyzmetkeriniń zańdy talaptaryna baǵynbai, qozǵalysyn jalǵastyrǵan", - dep habarlady oblystyq sot.
Sottalýshy ony qýdalap kele jatqanda, jasy kámeletke tolmaǵan bala joly joq jerge shyǵyp ketip, mototsikldiń basqarý júiesin igere almai, jerge qulaǵan.
Sol kezde inspektor qaýipsizdik sharalaryn qoldanbai, Jol júrisi qaǵidalaryn óreskel buzyp, jasy kámeletke tolmaǵandy qaǵyp ketken, sonyń saldarynan ol oqiǵa ornynda esin jimastan qaza bolǵan.
Prokýror sottalýshyny 2 jyl 6 ai merzimge bas bostandyǵynan aiyrýdy surady.
Jábirlenýshi ókili zańǵa sai jaza qoldanýdy surady. Sottalýshy óz kinásin moiyndady.
Atalǵan qylmys onsha aýyr emes qylmys, abaisyzda jasalǵan áreketter sanatyna jatady jáne 5 jylǵa deiin bas bostandyǵynan aiyrý jazasy qarastyrylǵan.
Sottalýshy QK-tiń 345-babynyń 3-bóligimen kináli dep tanylyp, oǵan 5 jyl merzimge kólik quraldaryn basqarý quqyǵynan aiyryla otyryp, 2 jyl alty aiǵa sottaldy. Azamattyq talap ishinara qanaǵattandyryldy. Sot úkimi zańdy kúshine engen joq.
