Bul týraly Atyraý oblysynyń ákimi Serik Shápkenov QR Prezidenti janyndaǵy Ortalyq kommýnikatsiialar qyzmetinde ótken baspasóz brifinginde málim etti. Óńir basshysynyń aitýynsha, Atyraý oblysy respýblika boiynsha investitsiia tartýdan kósh bastap tur.
- Tutastai alǵanda, elimizge tartylǵan investitsiianyń 13%-y Atyraý oblysyna tiesili. Al biyl 6 aida sheteldik tikelei investitsiia 1,1 mlrd AQSh dollaryn qurady. Barshyńyzǵa belgili Teńiz ken ornynda «Keleshek keńeiý» jobasy aiaqtalýda. Osy joba aiasynda óńirge biyl 840 mlrd. teńge investitsiia quiyldy. Degenmen, aimaqta ózge salalardy damytýǵa baǵyttalǵan investitsiia kólemi jyl saiyn artyp keledi,- dedi S.Shápkenov.
Jyl basynan beri Atyraýda jalpy quny 46,1 milliardtan asatyn 8 investitsiialyq joba iske qosyldy. Jyl sońyna deiin 24,2 mlrd teńge bolatyn 9 investitsiialyq joba jumysyn bastalady dep kútilip otyr.
Sondai-aq Memleket basshysy elimizdiń batysyndaǵy munai-gaz-himiia ónerkásibi klasterin damytý jónindegi tapsyrmasy aiasynda jylyna 1,25 mln. tonna polietilen óndiretin «Sillleno» zaýyty men jylyna 1 mlrd. tekshe metr gaz óndiretin Eskenedegi zaýyttyń qurylysy júrip jatyr. Aldaǵy jyldary býtadien, sintetikalyq kaýchýk shyǵaratyn «Býtadien» zaýytynyń jáne gaz bólý kesheniniń qurylysy bastalady dep kútilýde.
