Atyraýdaǵy bazardaǵy tóbeles jurttyń úreiin ushyrdy. Qaiǵyly jait adam ólimimen aiaqtalǵan, - dep habarlaidy Dalanews.kz "Almaty" telearnasyna silteme jasap.
Arna málimetinshe, eki adamnyń kikiljińine kóliktiń syrylyp ketýi sebep bolǵan. Atyraýlyqtar bazar mańyna barýdan qorqyp qalǵan. Al telearna málimetinshe, beinebaqylaý kamerasynan ashýly er adam ekinshi er adamdy toǵyz ret uryp, qulatqany kórinedi. 56 jastaǵy Amandyq Saǵynǵaliev aýrýhanaǵa jetkizilgenimen, alǵan soqqynyń áserinen ómirimen qosh aitysty. Al basty kúdikti oqiǵa ornynan dereý iz sýytqan.
"Oqiǵa osy jerde boldy. Biraq ol kisilerdiń ne istep jatqanyn kórgen joqpyn. Adamdar kóp jinalmady, mán bergen joqpyn", - dedi kýáger Gaýhar Izǵalieva.
Alǵashqylardyń biri bolyp oqiǵa ornyna marqumnyń qyzy jetken. Ol "ákemdi jedel járdem kóligine otyrǵyzyp jatqanda, judyryǵy jýan er adam áli de balaǵat sóz aityp jatqan" deidi. Al keiin kelgen týystaryna kúdikti tóbelestiń múldem basqasha órbigenin aitypty. "Sózge kelip qalyp, bir-aq ret urdym. Marqum ózi qulap, basyn soǵyp aldy" degen nusqaǵa qaitys bolǵan azamattyń týystary senip qalǵan. Olar "marqum jan balasyn renjitpeitin, abyroily tulǵa edi" dep eske aldy.
"Amandaq aǵamyz - elge qyzmet qylǵan aýylymyzdyń syily azamaty. Eldiń alǵysyn arqalaǵan, jaqsylyqtyń jarshysy, aqkóńil, adamdy renjitpek túgili, jándikke ziiany timeitin. Ol kisi qolynan qaza taýyp, aýylymyzdyń qabyrǵasyn qaiystyrdy. Otbasyna Alla sabyr bersin degim keledi", - dedi marqumnyń týysy Lázzat Tastaeva.
Qazir bul iske qatysty tergeý bastalǵan. Atyraý oblystyq Politsiia departamentiniń bastyǵy isti tikelei jeke baqylaýǵa alǵanyn málimdedi.
"Densaýlyqqa qasaqana aýyr ziian keltirip, adam ólimine alyp kelý deregi boiynsha qylmystyq is qozǵaldy. Kúdikti izin sýytpai ustalyp, ýaqytsha ustaý izoliatoryna qamaldy. Qazir sot-meditsinalyq saraptama taǵaiyndaldy", - dedi Atyraý oblystyq Politsiia departamentiniń bastyǵy Nurhat Orazbaev.
Aita keteiik, qaza bolǵan azamattyń denesi keshe jer qoinyna tapsyryldy. Marqumnyń artynda qaiǵy jutyp tutas áýlet, 4 balasy men 5 nemeresi qaldy.
