اتىراۋداعى بازارداعى توبەلەس جۇرتتىڭ ۇرەيىن ۇشىردى. قايعىلى جايت ادام ولىمىمەن اياقتالعان، - دەپ حابارلايدى Dalanews.kz "الماتى" تەلەارناسىنا سىلتەمە جاساپ.
ارنا مالىمەتىنشە، ەكى ادامنىڭ كيكىلجىڭىنە كولىكتىڭ سىرىلىپ كەتۋى سەبەپ بولعان. اتىراۋلىقتار بازار ماڭىنا بارۋدان قورقىپ قالعان. ال تەلەارنا مالىمەتىنشە، بەينەباقىلاۋ كامەراسىنان اشۋلى ەر ادام ەكىنشى ەر ادامدى توعىز رەت ۇرىپ، قۇلاتقانى كورىنەدى. 56 جاستاعى اماندىق ساعىنعالييەۆ اۋرۋحاناعا جەتكىزىلگەنىمەن، العان سوققىنىڭ اسەرىنەن ومىرىمەن قوش ايتىستى. ال باستى كۇدىكتى وقيعا ورنىنان دەرەۋ ءىز سۋىتقان.
"وقيعا وسى جەردە بولدى. ءبىراق ول كىسىلەردىڭ نە ىستەپ جاتقانىن كورگەن جوقپىن. ادامدار كوپ جينالمادى، ءمان بەرگەن جوقپىن"، - دەدى كۋاگەر گاۋھار ىزعالييەۆا.
العاشقىلاردىڭ ءبىرى بولىپ وقيعا ورنىنا مارقۇمنىڭ قىزى جەتكەن. ول "اكەمدى جەدەل جاردەم كولىگىنە وتىرعىزىپ جاتقاندا، جۇدىرىعى جۋان ەر ادام ءالى دە بالاعات ءسوز ايتىپ جاتقان" دەيدى. ال كەيىن كەلگەن تۋىستارىنا كۇدىكتى توبەلەستىڭ مۇلدەم باسقاشا وربىگەنىن ايتىپتى. "سوزگە كەلىپ قالىپ، ءبىر-اق رەت ۇردىم. مارقۇم ءوزى قۇلاپ، باسىن سوعىپ الدى" دەگەن نۇسقاعا قايتىس بولعان ازاماتتىڭ تۋىستارى سەنىپ قالعان. ولار "مارقۇم جان بالاسىن رەنجىتپەيتىن، ابىرويلى تۇلعا ەدى" دەپ ەسكە الدى.
"امانداق اعامىز - ەلگە قىزمەت قىلعان اۋىلىمىزدىڭ سىيلى ازاماتى. ەلدىڭ العىسىن ارقالاعان، جاقسىلىقتىڭ جارشىسى، اقكوڭىل، ادامدى رەنجىتپەك تۇگىلى، جاندىككە زيانى تيمەيتىن. ول كىسى قولىنان قازا تاۋىپ، اۋىلىمىزدىڭ قابىرعاسىن قايىستىردى. وتباسىنا اللا سابىر بەرسىن دەگىم كەلەدى"، - دەدى مارقۇمنىڭ تۋىسى ءلاززات تاستايەۆا.
ءقازىر بۇل ىسكە قاتىستى تەرگەۋ باستالعان. اتىراۋ وبلىستىق پوليسيا دەپارتامەنتىنىڭ باستىعى ءىستى تىكەلەي جەكە باقىلاۋعا العانىن مالىمدەدى.
"دەنساۋلىققا قاساقانا اۋىر زيان كەلتىرىپ، ادام ولىمىنە الىپ كەلۋ دەرەگى بويىنشا قىلمىستىق ءىس قوزعالدى. كۇدىكتى ءىزىن سۋىتپاي ۇستالىپ، ۋاقىتشا ۇستاۋ يزولياتورىنا قامالدى. ءقازىر سوت-مەديسينالىق ساراپتاما تاعايىندالدى"، - دەدى اتىراۋ وبلىستىق پوليسيا دەپارتامەنتىنىڭ باستىعى نۇرحات ورازبايەۆ.
ايتا كەتەيىك، قازا بولعان ازاماتتىڭ دەنەسى كەشە جەر قوينىنا تاپسىرىلدى. مارقۇمنىڭ ارتىندا قايعى جۇتىپ تۇتاس اۋلەت، 4 بالاسى مەن 5 نەمەرەسى قالدى.
