Ataqty short-trekshi Abzal Ájiǵaliev sporttaǵy mansabyn aiaqtaitynyn málimdedi, dep habarlaidy dalanews.kz.
"Short-trekpen alǵash ret 24 jyl buryn tanystym. Sol kúnnen bastap bul sport ómirimniń ajyramas bóligine ainaldy. Al 2009 jyldan bastap Qazaqstan ulttyq quramasy sapynda el namysyn qorǵaý baqyty buiyrdy. Osy jyldar ishinde barlyq qashyqta Qazaqstan chempiony atandym. Elimizdiń tarihynda alǵashqy álem kýbogynyń altyn medalin jeńip alyp, halyqaralyq jarystarda talai ret jeńis tuǵyryna kóterildim. Tórt ret Olimpiada oiyndaryna qatysyp, eki márte Qazaqstan Týyn Olimpiada arenasyna alyp shyǵý qurmetine ie boldym. Men - úshin bul eń úlken mártebe", - dedi ol.
Sportshy aldaǵy ýaqytta jinaǵan tájiribesi men bilimin Qazaqstan sportyn damytýǵa jumsap, jas sportshylarǵa qoldaý kórsetip, short-trektiń órkendeýine úles qosatynyn jetkizdi.
"Biyl kásibi sportshy retindegi mansabymdy aiaqtaý týraly sheshim qabyldadym. Kez kelgen sportshynyń jolynda jańa beleske qadam basar sát keledi. Men úshin dál sondai kezeń bastaldy. Osy jyldardyń ár sátine rizamyn. Aldaǵy maqsatym - jyldar boiy jinaǵan tájiribem men bilimimdi Qazaqstan sportynyń damýyna arnaý. Ulttyq quramanyń janynan tabylyp, jas sportshylarǵa baǵyt-baǵdar berip, Qazaqstan short-treginiń bolashaǵy úshin eńbek etýdi ózimniń azamattyq ári sport aldyndaǵy paryzym dep bilemin. ...Sporttaǵy missiiam aiaqtalǵan joq. Tek ol jańa deńgeide jalǵasady", - dep jazdy Abzal Ájiǵaliev.
