7 mamyr – Otan qorǵaýshylar kúni Ulan aýdanynyń Qasym Qaisenov kentindegi Batyrlar alleiasynda Otan qorǵaýshylar kúni men Uly Jeńistiń 80 jyldyǵyna arnalǵan «Uly Jeńis: Erlikke taǵzym, urpaqqa úlgi» atty saltanatty is-shara ótti,- dep habarlaidy Dalanews.kz
Is-sharany uiymdastyrýshylardyń aitýynsha, onyń maqsaty – patriotizmdi nyǵaitý, tarihi shyndyqty saqtaý jáne Qazaqstan halqynyń Uly Otan soǵysyndaǵy erlikterin jas urpaqqa jetkizý.
Shara bastalar aldynda Qasym Qaisenovke arnalǵan mýral ashylyp, Batyrlar alleiasynyń alańynda soǵys jyldaryndaǵy ánder shyrqaldy. Bul sát rýhani birlik pen rizashylyqtyń erekshe atmosferasyn qalyptastyrdy. Saltanatty rásim Memlekettik Gimnniń oryndalýymen jáne ShQO ákimi Nurymbet Saqtaǵanovtyń quttyqtaý sózimen ashyldy.
"Memorialdyq stella Uly Otan soǵysy men Aýǵan soǵysynyń ardagerlerine arnalǵan. Bul – bizdiń tarihymyzǵa degen qurmettiń, batyr babalarymyzǵa sheksiz taǵzymnyń belgisi. Munda Otan qorǵaýshy jas sarbazdar da qatysyp otyr. Olar batyrlardyń erligine laiyq bolýy kerek. Al qazaqstandyqtar beibit kúnniń batyrlary bolyp, eńbegimen Otanǵa degen súiispenshiligin dáleldeýi tiis.
Ulan óńiri – Otandy qorǵaý tarihyna altyn áriptermen jazylǵan 9 Keńes Odaǵynyń Batyry men bir Halyq Qaharmanynyń týǵan jeri. Olardyń arasynda erekshe oryn alatyn – aty ańyzǵa ainalǵan partizan, jazýshy, jerlesimiz Qasym Qaisenov.
Oblysta batyrlardyń esimin ulyqtaý baǵytynda júieli jumys júrgizilýde. Biyl Ulan aýdanynda 6 eskertkish jańartylyp, Qasym Qaisenovke arnalǵan mýral salyndy. Bul jumystar – ótkenge degen qurmetimizdiń aiqyn kórinisi jáne jas urpaqty otansúigishtikke tárbieleýdiń mańyzdy quraly. Biz Batyrlar alleiasy halyqty rýhtandyryp, jas býyndy Otanǵa degen súiispenshilik rýhynda tárbieleitin kieli orynǵa ainalady dep senemiz", – dedi oblys ákimi.
Kent turǵyndary úshin úlken mártebe – sharaǵa Halyq Qaharmany Qasym Qaisenovtiń uly Bolat Qaisenovtiń qatysýy boldy.
Saltanatty shara barysynda aýdandyq ardagerler keńesiniń tóraǵasy Aimuhamet Bákimbaev sóz sóiledi.
Is-shara Uly Otan soǵysynda qaza tapqan jaýyngerlerdi bir minýt únsizdikpen eske alýmen aiaqtaldy.
Aita ketý kerek, bul oqiǵanyń mańyzy tek jergilikti halyq úshin ǵana emes, Otan tarihyn qasterleitin barsha azamattar úshin zor. Ol Otan qorǵaýshylardyń erligi men janqiiarlyǵyn eske salady jáne olardyń erlikteri bolashaq urpaqqa úlgi bolyp qala bermek. Uly Jeńis rýhy – árqashan qazaqstandyqtardyń júreginde.
