Ata-analarynyń biriniń aıtýynsha, 12 qyrkúıekte oqýshylarǵa saýalnama toltyrý mindettelgen. Caýalnamadaǵy sońǵy suraqtardyń birinde otbasynyń materıaldyq jaǵdaıy jaıly, sondaı-aq oqýshylardyń ata-analary mektepke qandaı kómek kórsete alatyny jaıly suraqtar kezdesken. Jaýap retindegi nusqalardyń birinde ata-ana túrli-tústi prınter, kompúter qurylǵylaryn alyp bere alady degen jaýap bolsa, birinde ata-ana mektepten tys sharalardy uıymdastyrýǵa kómektesip, kólikpen qamtamasyz ete alady degen jaýaptar bolǵan.
– Áıelim osy saýalnamany kórsetti. Men ondaǵy suraqtardy kórip, qatty tańǵaldym. Muny qalaı túsinýge bolady? Mektep basshylyǵy mekemeni kompútermen ózderi qamtamasyz etýi kerek dep oılaımyn. Men mektep dırektorynyń bul jaıynda habary bar ma, joq pa ol jaǵyn bilmeımin. Bul saýalnama tek birinshi synyp oqýshylaryna berilgen. Bul jeke menshik mektep emes qoı. Ne degenmen memlekettik mekeme. Bul suraqtardy jasaǵanda mektep basshylyǵy Bilim basqarmasyndaǵylarmen nemese mınıstrliktegilermen aqyldasty ma degen suraq týady. Olar bul týraly bile me?, – dedi suhbattasýshy.
Sondaı-aq, ata-analardyń aıtýynsha, mektepte aı saıyn oqýshylardan aqsha jınaıtyn qor bar eken. «Oqýshy aı saıyn 4 myń teńge tóleýi kerek. Olardyń aıtýynsha, jınalǵan qarajat mektepti jetildirýge, jóndeý jumystaryna jáne kúzettegilerge beriledi»,– dedi ata-analardyń biri.
