اتا-انالارىنىڭ ءبىرىنىڭ ايتۋىنشا، 12 قىركۇيەكتە وقۋشىلارعا ساۋالناما تولتىرۋ مىندەتتەلگەن. Cاۋالناماداعى سوڭعى سۇراقتاردىڭ بىرىندە وتباسىنىڭ ماتەريالدىق جاعدايى جايلى، سونداي-اق وقۋشىلاردىڭ اتا-انالارى مەكتەپكە قانداي كومەك كورسەتە الاتىنى جايلى سۇراقتار كەزدەسكەن. جاۋاپ رەتىندەگى نۇسقالاردىڭ بىرىندە اتا-انا ءتۇرلى-تۇستى پرينتەر، كومپيۋتەر قۇرىلعىلارىن الىپ بەرە الادى دەگەن جاۋاپ بولسا، بىرىندە اتا-انا مەكتەپتەن تىس شارالاردى ۇيىمداستىرۋعا كومەكتەسىپ، كولىكپەن قامتاماسىز ەتە الادى دەگەن جاۋاپتار بولعان.
– ايەلىم وسى ساۋالنامانى كورسەتتى. مەن ونداعى سۇراقتاردى كورىپ، قاتتى تاڭعالدىم. مۇنى قالاي تۇسىنۋگە بولادى؟ مەكتەپ باسشىلىعى مەكەمەنى كومپيۋتەرمەن وزدەرى قامتاماسىز ەتۋى كەرەك دەپ ويلايمىن. مەن مەكتەپ ديرەكتورىنىڭ بۇل جايىندا حابارى بار ما، جوق پا ول جاعىن بىلمەيمىن. بۇل ساۋالناما تەك ءبىرىنشى سىنىپ وقۋشىلارىنا بەرىلگەن. بۇل جەكە مەنشىك مەكتەپ ەمەس قوي. نە دەگەنمەن مەملەكەتتىك مەكەمە. بۇل سۇراقتاردى جاساعاندا مەكتەپ باسشىلىعى ءبىلىم باسقارماسىنداعىلارمەن نەمەسە مينيسترلىكتەگىلەرمەن اقىلداستى ما دەگەن سۇراق تۋادى. ولار بۇل تۋرالى بىلە مە؟، – دەدى سۇحباتتاسۋشى.
سونداي-اق، اتا-انالاردىڭ ايتۋىنشا، مەكتەپتە اي سايىن وقۋشىلاردان اقشا جينايتىن قور بار ەكەن. «وقۋشى اي سايىن 4 مىڭ تەڭگە تولەۋى كەرەك. ولاردىڭ ايتۋىنشا، جينالعان قاراجات مەكتەپتى جەتىلدىرۋگە، جوندەۋ جۇمىستارىنا جانە كۇزەتتەگىلەرگە بەرىلەدى»،– دەدى اتا-انالاردىڭ ءبىرى.
