Májilis depýtaty Ashat Aimaǵambetov Semeide jańa jyldyq shyrshany bezendirý kezinde aýyr jaraqat alǵan muǵalimge bailanysty pikir bildirdi. Ol bul jaǵdaidy “jańsaqtyq” dep qarastyrýǵa bolmaitynyn, mundai oqiǵalar pedagogterdiń quqyǵyn óreskel buzatynyn atap ótti, dep habarlaidy Dalanews.kz.
“Pedagog mártebesi týraly” zańnyń 6-babynda muǵalimderdi kásibi mindetterine jatpaityn jumystarǵa tartýǵa qatań tyiym salynǵan. Jańa jyldyq shyrsha ornatý, kóshe tazalaý, basqa da naýqandarǵa májbúrlep qatystyrý siiaqty eski “dástúrlerden” birjola bas tartýymyz kerek. Bul – zańdy óreskel buzý”, – dedi depýtat.
Ashat Aimaǵambetov osy jaǵdaiǵa bailanysty naqty sharalar qabyldaý qajet ekenin alǵa tartty:
1. Oblys basshylyǵy bul oqiǵany muqiiat tergep, jaýapty tulǵalardy jazalaýy tiis.
2. Muǵalimderdi kásibi mindetine jatpaityn jumystarǵa tartýdy toqtatý úshin ministrlik baqylaýdy kúsheitýi qajet.
3. Bilim basqarmalary men mektep ákimshilikteri pedagogtardyń quqyqtaryn qatań saqtaý boiynsha óz mindetterin oryndaýy tiis.
“Memleket basshysy árdaiym muǵalimderdiń mártebesin qorǵaý men olardyń quqyqtaryn saqtaý máselesin erekshe nazarda ustap keledi. Bizdiń mindetimiz – sol talaptardy oryndap, zańnyń jumys isteýin qamtamasyz etý”, – dedi Aimaǵambetov.
Depýtat jaraqat alǵan muǵalim ministrliktiń baqylaýynda ekenin jetkizdi.
“Jaraqat alǵan áriptesimizge tezirek saýyǵyp ketýin tileimin. Ministrliktiń bul máseleni baqylaýǵa alǵany – úmit beredi”, — dep qosty ol.
Eske salaiyq, bul jaǵdaidy Oqý-aǵartý ministri Ǵani Beisembaev Facebook-tegi paraqshasynda málim etken edi.
Ministr atalǵan oqiǵaǵa bailanysty oblys basshylyǵy ádil ári jan-jaqty tekserý júrgizý kerek ekenin aitty.
"Semei qalasynda muǵalimderdi jańajyldyq shyrshany bezendirýge tartý jáne áriptesimizdiń osy is barysynda jaraqat alýy — zań buzýshylyqtyń aiqyn kórinisi. Pedagogterdi kásibi mindetterine jatpaityn mundai jumystarǵa tartý — «Pedagog mártebesi týraly» zańdy óreskel buzý dep sanaimyn. Bul oqiǵaǵa bailanysty oblys basshylyǵy ádil ári jan-jaqty tekserý júrgizip, aldaǵy ýaqytta mundai keleńsizdikterdiń qaitalanýyna jol bermeý úshin tiisti sharalar qabyldaidy dep úmittenemin", — dep jazdy ol.
